اسلام آباد۔21مارچ (اے پی پی) ملک ءِ صدر ممنون حسین ءَ اسلامی دنیاءِ عالم آنی سرءَ زور پِر داتگ کہ آ درآمدیں دودءُ ربیدگ ءِ اُرشءِ دیمپانی ءُ اسلامی دودءُ ربیدگ ءِ رکھینگ ءِ ھاترءَ علمی تک ءَ مھکمیں کار بہ کنت تنکہ انسانیت ءَ را فکری تکانسری ءَ چہ رکھینگ بہ بیتءُ پلاح ءُ گہبود ءِ کشگءَ گام جنگ بہ بیت ءُ مسلم دنیاءِ زانت کارءُ علمائے کرام ءَ را ناشرکاری ءَ را گرءُ دار کنگءِ ھاترءَ علمی ترءَ جیڑگ لوٹ ایت، آئیءَ اے گپ چارشمبے ءِ روچءَ مفتی اعظم مصر ڈاکٹر شوکی ابراہیم عبدالکریم ءَ گوں گپءُ تران کنانءَ کتگ کہ آھاں وتی ڈل ءِ ھراء ءَ ایوان صدرءَ آئیءِ گوما گندءُ نند کتگ۔ اے موھءَ مذہبی کارانی بنجاھی وزیر سردار محمد یوسف ، مصر ءِ سفیر احمد محمد فضل یعقوب ءُ دگہ مزنیں حکام ھم ساڑی بوتگ اَنت۔ ملکءِ صدر ءَ ڈلءَ را وش اَتک کتگءُ گشتگ کہ مفتی اعظم مصر ءِ ترءُ تاب دوھیں ملک آنی نیامءَ جہلیں سیادی ءِ تہا گیش پراھءُ شاھگانی ودی کنت۔ آئیءَ گشتگ کہ دوھیں براتیں ملک میاں اوستمانی جیڑھ آنی تہا یک وڈیں ھیالءُ لیکہ دار اَنت ءُ میاں اوستمانی فورم آنی سرءَ یکے دومیءِ گوما ھمراھ داری کن اَت۔ ملک ءِ صدرءَ گشتگ کہ عالم اسلام ءَ را جیڑھ ءُ جنجال ءِ تپاسی قرآن ءُ سنت ءِ روژنائی ءَ گیش ءُ گیوار کنگءِ حکمت عملی جوڈ کنگ لوٹ ایت۔ مفتی اعظم مصر ڈاکٹر شوکی ابراہیم ءَ اے موھءِ سرءَ ملک ءِ صدر ءَ را مصرءِ صدر جنرل عبدالفتح سیسی ءِ نیمگءَ چہ نیکیں وھگانی کلوھ دیم داتگ۔ آئیءَ گشتگ کہ پاکستانءُ مصر ءِ سیادی باز مھکم اِنتءُ آؤکیں روچاں ایشی ءِ تہا گیش جہلانکی ودی بیت۔ اے موھءِ سرءَ آئیءَ وتی ءُ مصری اُلسءِ نیمگءَ چہ پاکستانی اُلس ءَ را پاکستانءِ روچءِ مراد بات داتگ۔ آئیءَ ناشرکاری ءِ ھلاپ ءَ پاکستانی عالم آنی فتوے ءَ را ناشرکاریءَ را گرءُ دار کنگءِ ھوالگءَ یک ھاسیں تاک بندے لیک اِتگ۔
