اسلام آباد۔20مارچ(اے پی پی) پاک بحریہ ءُ پاکستان میری ٹائم سکیورٹی ایجنسی ءِ گراب پی این ایس ہمت ءُ پی ایم ایس ایس بسول دوحہ میاں اوستمانی میری ٹائم ڈیفنس نماش ءُ پاکستان ءُ گتر نیول فورسز آنی نیامءَ ھڈ بوھوکیں اولی بحری مشق ءِ تہا ھوار بوھگءِ ھاترءَ مشن کمانڈر، کموڈور محمد فیصل عباسی ءِ سروک ءَ 11 مارچ2018ءَ حمادءِ دھکہ ءَ سر بوتگ اَنت۔ پی این ایس ہمت جدید تریں فاسٹ اٹیک میزائل کرافٹ گراب اِنت کہ ھندی تکءَ پاکستانءَ جوڈ کنگ بوتگ۔ اے مشق ءِ تہا بازیں سرُءُ ُ پُرآنی برجمی بوتگ کہ ایشیءِ تہا ملکی ءُ درملکی دیمپانی ءُ سکیورٹی وزیر ، چیف آف اسٹاف ، بحری فوج آنی سروک ، کوسٹ گارڈ کمانڈر ءُ دیمپانی وزارتانی نمائدگ ھوار بوتگ اَنت۔ نماش ءِ تہا پاکستانءَ آبید اٹلی ، امریکہ ، انگلینڈ ، بنگلہ دیش ،بھارت ، عمان ءُ گتر ءِ گراب ھم ھوار بوتگ اَنت۔ گترءَ پی ایم ایس ایس بسول ءِ سرءَ یک دعوتے ءِ بندوبست کنگ بوتگ کہ آئیءِ تہا پاکستانءِ دیمپانی وزیر ، ڈائریکٹر جنرل پاکستان میری ٹائم سکیورٹی ایجنسی ، سفیر، دیمپانی ءُ نیول اتاشی ءُ بازیں ملک آنی سفارت خانہ ءِ نمائندگ ھوار بوتگ اَنت۔ ایشی ءَ ابید کمانڈر گتر امیری نیول فورسز ءُ گترءَ نندوکیں پاکستان ءِ مردم ھوار بوتگ اَنت۔ دوحہ انٹرنیشنل میری ٹائم دیمپانی نماش ءِ گڈی بھرءَ 15تاں 18مارچ2018ءِ تہا پاک بحریہ ءُ گتر امیری نیول فورسز ءِ نیام اسدالبحر ءِ نامءَ اولی بحری مشق کنگ بوتگ۔ پاکستانی گراباں چہ ابید گتر امیری نیول فورسز ءِ گراب ہوار، (HUWAR)، ال دیبل(AL DEEBEL)ءُ ال لیوسیل(AL LUWSAIL)ءُ دوملٹی رول ٹیکٹیکل گراباں مشقءِ تہا بھر زُرتگ۔ اے مشقءَ را راج دپتری بن اِشت لیکگ بوھگءَ اِنت۔ اے مشق ءِ تہا کمبیٹ سرچ اینڈر یسکیو ءُ بورڈنگ آپریشنز ھم سرجمیں ندارگ پیش داشتگ۔اے مشق باز جوانیں نتیجگ دیمءَ کااَنت ءُ ایشی ءِ تہا آؤکیں وھداں گیش بحری اُرد ھوار بنت۔ گتر ءِ سوبمندیں ترءُ تابءَ پد پاکستانی گراب 19مارچءَ دوحہ ءِ دھکہ ءَ چہ رھادگ بوتگ اَنت کہ آ گترءِ امیری نیول فورسز آنی آفیسر ءُ دوحہ ءَ پاکستانی ءِ دیمپانی اتاشی ءَ ھدا حافظ کتگ۔
