اسلام آباد:19مارچ(اے پی پی) پاک بحریہ ءِ سروک ایڈمرل ظفر محمود عباسی ءَ کویت ءِ سرکاری ترءُ تابءِ تہا ایڈمرل ظفر محمود عباسی ءَ کمانڈر کویت نیول فورسز بریگیڈیئر جنرل خالد عبداللہ ءُ کمانڈر کوسٹ گارڈ کمانڈر شیخ مبارک علی یوسف ال صباح ءَ گو ں گندءُ نند کتگ۔ پاک بحریہ ءِ جارچین ءِ گشگءِ ردءَ کویت نیول فورسز ءِ سروک بریگیڈیئر جنرل خالد عبداللہ ءَ گوں گندءُ نند ءِ تہا ایڈمرل ظفر محمود عباسی ءَ دونیمگی ھدوکی ءُ دونیمگی بحری کمک ءِ کارانی سرءَ ھیالءُ لیکہءِ درشانی کتگ۔ دوھیں ملک آنی بحری فوج آنی سروکاں تربیت، تکنیکی مردمانی قوت ءُ زانتکاریءِ پھجارینگءِ پڑآں دوھیں اُردانی نیام ءَ کمکءَ را گیش کنگءِ سرءَ ھیال ءُ لیکہ ءِ درشانی کتگ۔ آئی ءَ پاک بحریہ ءُ کویت نیوی ءِ نیامءَ بازیں پڑانی تہا دونیمگی نزیکی ءُ مھکمیں بحری سیادی ءِ سرءَ زور پِرداتگ۔ بریگیڈیئر جنرل خالد عبداللہ ءَ دمگی بحری امنءُ ایمنی ءُ مھکمی ءِ ھوالگءَ مؤثر ءُ مھکمیں گامگیج چست کنگءِ سرءَ پاک بحریہ ءِ کردءَ راساڑاتگ۔ پاک بحریہ ءِ سروک ءَ کویت ءَ پاکستانءِ سفیر غلام دستگیر ءُ سلاھ بندیں فوج آنی پیسرگیں عہدگ داراں گوں گندءُ نند کتگ۔ پاک بحریہ ءِ سروک ءِ اے ترءُ تاب دوھیں ملک ھاس دوھیں بحری فوج آنی نیامءَ دونیمگی کمک ءَ را گیش مھکم ءُ پراھءُ شاھگان کنگءِ سوب جوڈ بیت۔
