اسلام آباد۔15مارچ(اے پی پی) تئی کارانی بنجاھی وزیر پروفیسر احسن اقبال ءَ گشتگ کہ ملکءِ تہا امنءُ ایمنی جوڈ کنگءَ ابید دیمروئی ءُ وشھالی ءِ منزل ھاصل کنگ نہ بیت ، 2025ءَ پاکستان دنیا ءِ اولی 25معیشت آنی تہا بیت، مارا ٹیکنالوجی ءِ گوما ھم گام بوھگ لوٹ ایت، پاکستانءِ تہا ہرچیزھراب نہ اِنت مہ بازیں سوبمندی ھاصل کتگ، سرجمیں ملکءِ تہا دیمروئی ءِ منصوبہ جاری اَنت، ناشرکار مرچی گٹءِ تہا اَنت مہ آھاناں چپءُ چاگرد کتگ وھدے کہ چار سال پیسر ناشرکاراں مارا گٹ ءِ تہا کتگ بوتگ ءُ مارا چپءُ چاگرد کتگ بوتگ ، ھمک ضلع ءِ تہا مزن شاہ دربرجاھ کیمپس جوڈ کنگ بیت، لیپ ٹاپ فار آل ءِ سیکم بندات کنگ بوھگءَ اِنت، ھمک نودربرءَ را لیپ ٹاپ دیئگ بیت۔ پنچ شمبے ءِ روچءَ پاکستان انسٹیٹیوٹ فار کنفلکٹ اینڈ سکیورٹی سٹیڈیز ءِ چیردستی ءَ ’’ قومیت ءُ پاکستانیت‘‘ ءِ سرھال ءِ سرءَ مراگش ءَ گوں تران کنانءَ آئی ءَ گشتگ کہ انوگیں دورگشادی ءَ گوں مٹ بوھوکیں دنیاءِ دور اِنت۔ منی نسل ءِ مردماں لوح ءُ سلیٹ ءَ چہ ٹیب ءُ نوٹ بک ءِ سفر دیستگ، مرچی وانگ جاھ آنی تہا لوح ءُ سلیٹ ءِ جاھءَ پی سیز ءُ فورجی ٹیکنالوجیز کارمرز بوھگءَ اِنت، چاک ءِ جاھءَ فورجی ءُ سلیٹ ءِ جاھءَ کمپیوٹر سکرین اَتکگ۔
