اسلام آباد ۔ 9 مارچ (اے پی پی) جے یو آئی (ف) ءِ کماش مولانا فضل الرحمانءَ اقوام متحدہ ءِ انسانی حقانی کمیٹی ءِ دیوان ءِ تہ پاکستانی نماھندگ ءِ در ساڑی ءِ نوٹس گرگ ءِ لوٹ کنان ءَ گوشت کہ عالم اسلام ءِ جیڈھانی گیش ءُُ گیواری ءِ ھاترا پاکستان ءَ را قائدانہ کرد ادا کنگ لوٹ ایت۔ جمعہءَ راجی اسمبلی ءِ تہ ھیالانی درشان کنان ءَ آہاں گوشت کہ مشرق وسطیٰ ءُُ دگنیا ءِ دگہ دمگاں مسلمانانی ھلاپ ءَ زلم ءُُ زوراکی ءِ سرجمیں ھال دات ءُُ گوشت کہ عرب دگنیا ءِ استیں جاورھال گریٹر اسرائیل ءِ ہڈ دیگ ءِ ایجنڈہ ءِ بہر انت۔آہاں گوشت کہ شام ءِ تہ یک انسانی المیہ دیما اتکگ ءُُ میان اوستمانی ادرگ ءِ رپوٹ آنی ردا چار ءُ چہ بگر داں یازدھ لکھ شامی مسلمان شہید ءُُ ٹپی بوتگ انت۔آہاں گوشت کہ کلیں مسلمان یک امت انت ءُُ امت ءِ وڈ ءَ مارا مسلمانانی جیڈھانی گیش ءُُ گیواری ءِ ھاترا وتی کرد پیلو کنگی انت۔آہاں گوشت کہ تپاکیں راجانی انسانی حقانی کمیٹی ءِ ھشت مسلمان ملک باسک انت ،وھدیکہ شام ءِ ھوالہ ءَ چہ اُودا منگ نامہ ھم پیش کنگ بوتگ تو آہاں چہ سئے باسک ملک درساڑی اتنت ایشانی تہ پاکستان ھم ھوار انت
