اسلام آباد۔ 8 مارچ (اے پی پی) مزن وزیر شاہد خاقان عباسی ءَ زالبول آنی ھک آنی رکھینگ ءُُ جتا جتائیں شوبگ آنی تہ ءَ دیمروئی ءِ موہ پُجارینگ ءِ واستہ جوانیں گومگیج چست کنگ ءِ جزم ءِ درشان کنان ءَ گوشت کہ زالبول آنی انڈیوجل ءُُ یک ءَ چہ گیش پڑ ءَ معاشی، سیاسی ءُُ معاشرتی رنگ ءَ وت مستر ءُُ دیمروئی ءِ واستہ جوانیں جاور پُجارینگ ءِ توامیں کوشست جاڑی دار اَنت، زالبول آنی جیڈھ زوت گیوار بنت۔ آئی ءَ اے گپ پنچ شمبے ءِ روچ ءَ زالبول آنی میاں اوستمانی روچ ءِ درگت ءَ مزن وزیر کارگس ءَ برجم داشتگیں مراگش ءَ گشتانک دیان ءَ کت ایشی ءِ تہ ءَ زندمان ءِ جتا جتائیں شوبگ آں گوں سیادی داروکیں زالبول آں بھر زوری کت۔ مزن وزیر ءَ زالبول آنی میاں اوستمانی روچ ءِ موہ ءَ سرجمیں ملک ءَ زالبول آناں چاگردی، سیاسی، معاشی ءُُ زندمانی ءِ ایندگہ شوبگ آنی تہ ءَ کامیاتی چست کنوک آناں مبارکی پیش کنان ءَ گوشت کہ اے روچ اے جزم ایگ اِنت کہ ما ایڈیوجل ءُُ یک ءَ چہ گیش پڑ ءَ وتی کوشست آنی جوانی ءَ جاڑی بدار آں تانکیہ مئے زالبول چاگردی، معاشی، معاشرتی ءُُ سیاسی ھک بہ رکھ اَنت ءُُ آھودا آئی ءِ زندمانی آنی ھمک شوبگ ءَ وتی ازم آنی رد ءَ دیم ءَ جنزگ ءِ موہ بہ رسیت۔
