اسلام آباد ۔ 7 مارچ (اے پی پی) چیئرمین سینیٹ ءِ گچین کاری ءِ واستہ ملک ءِ مزنیں سیاسی گل آنی فاٹا، جے یو آئی (ف) ءُُ آزاتیں باسک آں گوں رابطہ آنی تہءَ یک شل ءَ ترندی پیداک انت، ھسابی رد ءَ ھما سیاسی گل ءِ باسک گیش بنت چیئرمین سینیٹ ھم ھمے پارٹی ایگ بیت۔ چیئرمین سینیٹ ءِ گچینی تگ ءُُ تاچ ءَ سروکیں گل مسلم لیگ (ن) ءُُ بُکگ جنوکیں پارٹی پیپلز پارٹی ءِ گیشاں چہ گیش باسک آنی کمک ءِ واھگ دار اَنت۔ دوئیں گل آں چیئرمین سینیٹ ءِ بابت ءَ وتی امیت ءِ واستہ گیشاں چہ گیش کمک زورگ ءِ رد ءَ رابطہ ترند کتگ اَنت۔ مسلم لیگ (ن) ءَ چیئرمین سینٰٹ ءِ گچین بوھگ ءِ ھوالگ ءَ وتی کمکی گل جے یو آئی (ف) ، پختونخوا ملی عوامی پارٹی ءُُ ایندگہ آزاتیں باسک آں گوں رابطہ ءِ بندات کتگ۔ چار شمبے ءَ بُنجاھی دارلحکومت اسلام آباد ءَ مسلم لیگ (ن) ءِ سروک ءُُ پیسریگیں مزن وزیر محمد نواز شریف ءَ پارٹی سروک آں گوں شور ءُُ سلاھھ ءُُ آئی ءَ گوں جے یو آئی (ف) ءِ امیر مولانا فضل الرحمن ءَ ھم گند ءُُ نند کت۔ نواز شریف ءَ حکومتی تک ءَ پنت ءُُ شون کت کہ ملک ءِ توامیں سیاسی مردم آں گوں اے رد ءَ رابطہ آناں گیش جوان کنگ بہ بیت وھدیکہ پیپلز پارٹی ءِ شریکیں چیئرمین آصف علی زرداری ءَ ھم پارٹی سروک ڈاکٹر عبدالقیوم سومرو ءِ وسیلگ ءَ رابطہ آنی بندات کتگ۔ ڈاکٹر عبدالقیوم سومرو پی ٹی آئی، فاٹا ءُُ بلوچستان ءَ چہ گچین بوتگیں آزاتیں باسک آنی گوما رابطہ کنگ ءَ انت۔ ھما گل ھسابی گیشی ءَ کامیات بیت چیئرمین سینیٹ ھما پارٹی ایگ بیت۔
