اسلام آباد ۔ 2 مارچ (اے پی پی) سینیٹ ءِ 52 سیٹ آنی سر ءَ گچین کاری (مرچی) شمبے ءِ روچ ءَ بیت۔ سروکیں گل مسلم لیگ (ن) ءِ توامیں باسک آمید گس ءِ پیسلہ ءَ پد آزاتیں باسک ءِ بستار ءَ الیکشن ءَ بھر زوری کن اَنت۔ الیکشن کمیشن ءِ نیمگ ءَ سینیٹ گچین کاری ءِ واستہ انتظامی آناں پکوئیں رنگ دیگ بوت۔ پنجاپ، سندھ، خیبر پختونخو ءُُ بلوچستان ءِ سینیٹر آنی گچین کاری ءِ واستہ پولنگ چاریں صوبائی اسمبلی آنی تہ ءَ بنت وھدیکہ اسلام آباد ءُُ فاٹا ءِ سیٹ آنی واستہ پولنگ قومی اسمبلی ءَ بنت، سندھ ءُُ پنجاب ءَ چہ 12، 12 سینیٹر آنی گچین کاری بیت وھدیکہ خیبر پختونخوا ءُُ بلوچستان ءَ چہ 11،11 سیینیٹرز گچین بنت، فاٹا ءَ چہ 4ءُُ اسلام آباد ءَ چہ 2 باسک ایوان بالا ءِ بھر جوڑ بنت۔ سرجمیں ھال آنی رد ءَ سینیٹر آنی کانودی وھد ءُُ پاس 6 سال ایگ بیت ءُُ ھمک سئے سال ءَ پد سینیٹ ءِ نیم باسک آنی وھد ءُُ پاس سرجم بوھگ ءَ پد ریٹائر بنت ءُُ نیم باسک نوک گچین بنت ءُُ کاینت۔ سینیٹ ءِ نیم بزاں 52سیٹ آنی سرءَ گچین کاری بوھگ ءَ اِنت۔ سندھ ءُُ پنجاب ءَ چہ 12،12 سینیٹرز آنی گچین کاری بیت وھدیکہ خیبر پختونخوا ءُُ بلوچستان ءَ چہ 11،11 سیینیٹرز گچین بنت، فاٹا ءَ چہ 4 ءُُ اسلام آباد ءَ چہ 2 باسک ایوان بالا ءِ بھر جوڑ بنت۔ 2018ءِ گچین کاری ءَ ھواری ءَ 131 امیت وار میدان ءَ اَنت۔ سرجمیں ملک ءَ چہ پیپلز پارٹی ءِ 20، ایم کیو ایم پاکستان ءِ 14، تحریک انصاف ءِ 13، پاک سرزمین پارٹی ءِ 4 وھدیکہ 65 آزاد امیدوار سینیٹ گچین کاری ءَ بھر زوری کن اَنت۔ آزاتیں امیت وار آنی تہ ءَ مسلم لیگ (ن) ءِ ھما 23امیت وار ھم ھوار اَنت ھما کہ پارٹی ٹکٹ ءِ سر ءَ الیکشن ءَ اوشتات نہ کن اَنت چیا کہ آمید گسی پیسلہ ءَ چہ پد آزاتیں امیت وار ءِ بستار ءَ گچین کاری ءَ اوشتگ ءِ اجازت دیگ بوتگ۔ پنجاب ءُُ سندھ ءَ 7، 7 جنرل سیٹ ، زالبول ءُُ ٹیکنوکریٹ ءِ 2، 2 سیٹ ءُُ یک گور ءُُ بکلال (اقلیت) ءِ سیٹ ءِ گچین کاری بیت وھدیکہ خیبر پختونخوا ءُُ بلوچستان ءَ 7،7 جنرل سیٹ وھدیکہ زالبول ءُُ ٹیکنوکریٹ ءِ 2، 2 سیٹ آںی سرءَ گچین کاری بیت۔ فاٹا ءَ 4 جنرل سیٹ وھدیکہ اسلام آباد ءَ یک جنرل سیٹ ءُُ یک ٹیکنو کریٹ ءِ سیٹ ءِ واستہ گچین کاری بیت۔ امیت وار آنی سیٹ آنی بھر ءُُ بانگ ءَ پنجاپ ءَ چہ 20 امیت وار لڑ ءَ ھوار اَنت۔ جنرل سیٹ آنی سر ءَ 10، زالبول آنی سیٹ ءِ سر ءَ 3، ٹیکنوکریٹ سیٹ آنی سرءَ 5 وھدیکہ گور ءُُ بکال آنی سیٹ ءِ سر ءَ 2 امیت وار میدان ءَ ایر کپ اَنت۔ سندھ ءَ چہ ھواریں رنگ ءَ 33 امیت وار الیکشن ءَ بھر زوری کن اَنت۔ جنرل سیٹ آنی سرءَ 18، ٹیکنوکریٹ سیٹ آنی سرءَ 6، زالبول آنی سیٹ ءِ سرءَ 6 وھدیکہ گور ءُُ بکال آنی سیٹ آنی سر ءَ 3امیت وار باج برئی کن اَنت۔ ھمے رنگ ءَ خیبر پختونخوا ءَ چہ سینیٹ ءِ 11 سیٹ آنی واستہ 27 امیت وار آنی نیام ءَ باج برئی بیت، جنرل سیٹ آنی سر ءَ 14، ٹیکنوکریٹ سیٹ آنی سر ءَ 5 ءُُ زالبول آنی سیٹ ءِ سر ءَ 8 امیت وار تچ ءُُ تاگ ءِ تہ ءَ گون اَنت۔ بلوچستان ءَ چہ 25 امیت وار سینیٹ الیکشن ءَ بھر زوری کن اَنت، جنرل سیٹ آنی سر ءَ 15، زالبول آنی سیٹ ءِ سر ءَ 6وھدیکہ ٹیکنوکریٹ سیٹ ءِ سر ءَ 4 امیت وار آنی نیام ءَ باج برئی بیت۔ پنجاپ ءِ واستہ 1600 بیلٹ پیپرز، سندھ ءِ واستہ 800، خیبر پختونخوا ءِ واستہ 600، بلوچستان ءِ واستہ 300، اسلام آباد ءِ واستہ 800 ءُُ فاٹا ءِ واستہ 50 بیلٹ پیپرز آنی چھاپ کنگ ءِ کار سرجم بوتگ ءُُ سیادی داروکیں ریٹرننگ اپسرگ ءِ ھوالگ ءَ کنگ بوتگ اَنت۔ سیکورٹی ءِ بابت ءَ ریجنرز ءُُ ایف سی ءَ چاریں صوبائی اسمبلی ءُُ پارلیمنٹ گس ءِ ڈن ءَ گاٹ اوشتارینتگ اَنت۔ پولنگ ءِ بندات سھب ءِ 9بج ءَ بیت ءُُ ابید دگہ مھتلی ءَ 4بج ءَ تاں جاڑی دارگ بیت۔ ووٹ ءِ رازداری ءَ را دل یکیمی جوڑ کنگ ءُُ دگہ اشتاپیں جاور ھال آں گوں گر ءُُ دار کنگ ءِ واستہ الیکشن کمیشن ءَ توامیں ریٹرننگ اپسرگ آناں مجسٹریٹ ءِ درجگ اختیار دیگ بوتگ۔ الیکشن کمیشن ءِ نیمگ ءَ ھاسیں پنت ءُُ شون توامیں ووٹر آناں جاڑی کنگ بوتگ اَنت کہ آ وتی موبائل فون پولینگ سٹیشن ءِ اندر ءَ میار اَنت۔ اے رد ءَ چیف الیکشن کمشنر جسٹس سردار محمد رضا ءِ سروکی ءَ 28فروری ءَ دیوان برجم دارگ بوتگ اَت ایشی ءِ تہ ءَ ریٹرننگ اپسرگ آناں ھاسیں پنت ءُُ شون جاڑی کنگ بوتگ اَتنت کہ آ ووٹ ءِ شرپ ءُُ رازداری ءَ را دل یکمیمی جوڑ کنگ ءَ جوانیں گامگیج بکن اَنت۔ ’’غیر حتمی‘‘ نتیجگ 3 مارچ ءِ بیگاہ ءَ ریٹرننگ اپسرگ جاڑی کن اَنت۔
Back to Conversion Tool
