حکومت ھاس ریاض ءُ سائنس ءِ پڑءَ معیاری وانگءُ زانگءِ گیش کنگءِ ھاترءَ گامگیج کنگ ءِ ضلورت ماریت، اے مولءُ مراد ءِ ھاترءَ ھرچ سوج ءَ را وش اَتک کن اَنت
اسلام آباد۔یکم مارچ (اے پی پی) مزن وزیر شاہد خاقان عباسی ءَ گشتگ کہ حکومت ھاس ریاضی ءُ سائنس ءِ پڑءَ جوانیں وانگءُ زانگ ءِ ھاترءَ سک باز گامگیج کنگءِ ضلورتءَ ماریت ءُ اے مولءُ مرادءِ ھاترءَ ھرچ وڈیں سرءُ سوجءَ را وش اتک کنت۔ آئی ءَ اے گپ پاکستان الائنس فارمیتھ اینڈ سائنس ءِ ڈل ءَ گوں گپءُ تران کنانءَ کتگ کہ آھاں پنچ شمبے ءِ روچءَ مزن وزیر کارگسءَ گندءُ نند کتگ۔ ڈل ءِ تہا ڈاکٹر نیلوفر ہلائی، مشرف زیدی، ڈاکٹر منظور سومرو، محترمہ ہما ضیاء، نمرا طارق، سلمان نوید خان، محترمہ لالہ رخ، عبدالرؤف، پرتاب شیوانی، جنید دھارم، ڈاکٹر فیصل خانءُ بانک ندا بخاری ھوار بوتگ اَنت۔ ڈل ءِ باسکاں مزن وزیر ءَ نودربرانی تہا سائنس ءُ ریاضیاتی علمءِ تہا ھدوکی ودی کنگءِ ھاترءَ الائنس فارمیتھ اینڈ سائنس ءِ سُرءُ پرآنی ھوالگءَ سرپد کتگ کہ ملک ءِ سماجی ءُ اقتصادی دیمروئی ءِ بنیات اِنت۔ ڈل ءَ مزن وزیرءَ را سرجمیں ملک ءِ تہا سائنسءُ ریاضی ءِ پڑءَ جوانیں وانگءُ زانگ ءَ را گیش کنگءِ ھاترءَ سرءُ سوج کتگ ۔ مزن وزیرءَ سوجاناں وش اَتک کتگءُ ڈلءَ را اوست داتگ کہ حکومت ھاس ریاضی ءُ سائنس ءِ پڑءَ جوانیں وانگءُ زانگءَ را گیش کنگءِ بازیں گامگیجے کنگءِ ادارگءَ کنت۔ آئیءَ گشتگ کہ ملکءِ تہا جوانیں تعلیم ءِ گیش کنگءُ اے پڑءَ ھاس بنکی گامگیج کنگءِ ھاترءَ الائنس ءِ گوما یکجاھ کنگءِ ھاترءَ بنجاھی حکومتءِ نیمگءَ چہ ھرچ وڈیں اوست دیئگ بوتگ۔
