اسلام آباد۔22فروری (اے پی پی ) ایوان بالاءَ را ھال دیئگ بوتگ کہ گوستگیں پنچ سالانی تہا ملکءَ سئے مزنیں زمین چنڈاں چہ 748مردم بیران وھدے کہ 2731ٹپیگ بوتگ اَنت۔ پنچ شمبے ءِ روچءَ ایوان بالاءَ جستءُ پُرس ءِ وھدءَ سینیٹر ڈاکٹر جہانزیب جمالدینی ءِ جستءِ پسوءَ وزارتءِ نیمگءَ چہ ھال دیئگ بوتگ کہ 2015ءَ اَتکگیں زمین چنڈانی تہا خیبر پختونخوا ءَ 225، پنجاپ ءَ 5، آزاد جموں و کشمیر ءَ 2، گلگت بلتستان ءَ 10ءُ فاٹا ءَ 30مردم بیران بوتگ اَنت۔ اکتوبر 2015ءِ زمین چنڈءَ 81ہزار 695لوگ کم ءُ 29ہزار 373لوگ سرجمءَ تباہ بوتگ اَنت۔ گوستیں پنچ سالانی تہا زمین چنڈ ءِ آماچیں مردماناں ملامءِ دیئگءِ ھاترءَ بنجاھی ءُ صوبائی حکومت آں 16409.40ملین کلدار ھمگرنچیں صوبائی اسٹیٹ ءُ دمگی اتھارٹیز ءَ را دیئگ بوتگ۔
