اسلام آباد۔19فروری (اے پی پی) ملک ءِ صدر ممنون حسین ءَ گشتگ کہ پاکستان ءَ ناشرکاری ءِ سرین پروشتگ، نوں بچتگیں ناشرکار سیمسرآں چہ آدیم پاکستانءَ پیداک اَنت آھانی گر ءُ دارءِ ھاترءَ پاک ۔اوگان سیمسرآنی سرءَ ٹھٹ جنگ بوھگءَ اِنت کہ آئی ءِ نتیجگءَ زوت ناشرکارانی ھلاسی بیت۔ اے ھوالگءَ پاکستان اوگانستان حکومتءِ گوما یکوئی ءَ نزیکی کنگءَ اِنت۔ آئیءَ اے گپ ملائیشیا ءِ رائل نیویءِ سروک ایڈمرل تان سری احمد قمرالزمان ایچ جے احمد بدرالدین ءَ گوں دوشمبے ءِ روچءَ گندءُ نندکنانءَ کتگ۔ ایشی ءَ چہ پیسر یک پُرمڈاھیں مراگشے ءِ تہا آئی ءَ را نشان امتیاز (ملٹری) ھم دیئگ بوتگ۔ مراگشءِ تہا ملائیشیا ءِ سفیر اکرام بن محمد ابراہیم ءُ چیف آف نیول سٹاف ایڈمرل ظفر محمود عباسی ءَ ابید مزنیں حکام ھم ساڑی بوتگ۔ ملک ءِ صدر ءَ گشتگ کہ پاکستانءُ ملائیشیا ءِ نیامءَ بے مٹیں براتیں سیادی اَست، مارا وشی اِنت کہ ’’ آسیان‘‘ ءِ سرجمیں ڈائیلاگ پارٹنرشپ ءِ ھاترءَ ملائیشیا ءَ دائم ءَ پاکستانءِ گوما ھمراھ داری کتگ کہ ایشی ءِ سرءَ مہ آئی ءِ شگرءُ منتءَ گر اں۔ ملکءِ صدر ءَ گشتگ کہ ناشرکاری ءِ ھلاپ ءَ آپریشن ’’ ضرب عضب ‘‘ ءُ ’’ ردالفساد‘‘ سوبمند بوتگ اَنت ءُ ملک ءَ چہ ناشرکاری ھلاس بوتگ۔ نوں سیمسرآں آ دیم ناشرکار پیداک اَنت ایشانی گرءُ دار کنگءِ ھاترءَ اوگان حکومت ءَ گوں گپءُ تران جاری اِنت۔
