اسلام آباد۔ 14فروری( اے پی پی) ملکءِ صدر ممنو ن حسینءَ گشتگ کہ مشرق وسطیٰ ءِ تہا امنءُ ایمنی ءُ مھکمی خطہ ءُ میاں اوستمانی امنءُ ایمنی ءِ ھاترءَ المی اِنت ءُ اُمیت اِنت کہ شامءُ لیبیا ءِ تہا زوت مھکمی پیداک بیت ءُ اے دوھیں ملک آنی اُلس امنءُ ایمنی ءِ گوما زند گوازینت کن اَنت۔ آئیءَ اے گپ چارشمبے ءِ روچءَ ایوان صدرءَ لیبیا ءِ ھاترءَ پاکستان ءِ نامینتگیں سفیر میجر جنرل (ر) ساجد اقبال ءُ شا م ءِ ھاترءَ نامینتگیں سفیر ایئر مارشل (ر) راشد کمالءَ گوں جتاھ جتاھ گندءُ نند ءِ تہا کتگ۔ ملکءِ صدر ممنون حسین ءَ گشتگ کہ پاکستان شام ءُ لیبیا ءِ گوما سیادی ءَ را سک باز ارزشت دنت۔ ملکءِ صدر ءَ نامینتگیں سفیر آناں پرمان داتگ کہ آ دوھیں ملک آنی نیامءَ بیپارءَ را گیش کنگءِ ھاترءَ گامگیج بہ کنت ءُ اُلس ءِ نیامءَ نزیکی ءِ تہا گیشی کنگءَ دلگوشی بہ کن اَنت ۔ آئیءَ گشتگ کہ پاکستان لیبیاءُ شام ءِ نیامءَ بازیں پڑآنی تہا کمک ءَ را گیش کنگءِ ضلورت اِنت تنکہ سیادی ءِ تہا گیش جہلانکی ودی کنگ بہ بیت۔ آئیءَ گشتگ کہ لیبیا ءُ شام ءِ گوما پاکستان ءِ سیادی راج دپتری ، دود ءُ ربیدگی ءُ مذہبی بنیاتءِ سرءَ اَنت۔
