پاکستان ءُ اردن ءِ نیامءَ بیپاری، وانگءُ زانگءُ دودءُ ربیدگی پڑآنی تہا کمکءَ را گیش کنگءِ سرءَ تپاک
اسلام آباد۔09فروری (اے پی پی ) ملک ءِ صدر ممنون حسین ءُ اردنءِ شاہ عبداللہ ءَ دوھیں ملک آنی نیامءَ بیپاری، وانگءُ زانگ ءُ دودءُ ربیدگی پڑآنی تہا کمک ءَ را گیش کنگءِ سرءَ تپاک کتگءُ گشتگ کہ پاکستان ءُ اردن بازیں پڑآنی تہا ھاسیں تجروبتاں چہ یکے دومی ءَ را پاھدگ دات کن اَنت۔ دوھیں رھشونانی نیامءَ اے تپاکی ایوان صدر ءَ جمعہ ءِ روچءَ بوتگیں گندءُ نند ءِ تہا کنگ بوتگ۔ اے موھءِ سرءَ ملکءِ صدر ءِ کمک دیمپانی ءِ وزیر انجینئر خرم دستگیر خان ، دری کارانی سیکرٹری ءُ دگہ مزنیں حکام ءَ کتگ وھدے کہ شاہ عبداللہ ءِ کمک اردن ءِ دری کارانی وزیر ایمن سفادی ، چیئرمین جوائنٹ چیفس آف اسٹاف لیفٹیننٹ جنرل محمود فریحات ءُ دگہ مزنیں حکام ءَ کتگ۔ ملکءِ صدرءَ گشتگ کہ امریکا ءِ نیمگءَ چہ یروشلم ءَ را اسرائیل ءِ بنجاھی حکومت کنگءِ جیڑھ ءِ سرءَ اردن ءَ بہادری پیش داشتگ، پاکستان ایشی ءَ را شرپ دنت۔ اے موھءِ سرءَ اردن ءِ شاہ عبداللہ ءَ گشتگ کہ پاکستان ءِ نیمگءَ چہ مسلم امہءِ جیڑھءِ گیشءُ گیواری ءِ ھاترءَ کہ آگپ کنگ بوتگ اَنت آھاں چہ سدکی بوتگ۔ صدر ءَ اے سوج داتگ کہ پاکستانءُ اردنءِ نیامءَ گیشاں چہ گیش بیپاری ڈلانی یکے دومی ءِ گورءَ دیم دیئگ بہ بیت۔ شاہ عبداللہ ءَ صدرءِ سوجءِ سرءَ تپاک کتگ ءُ گشتگ کہ دوھیں ملک آنی معیشت ءِ مھکمی ءِ ھاترءَ دونیمگی بیپاری ءِ تہا گیشی المی اِنت۔ اے ھوالگءَ مارچءَ یکجائی وزارتی کمیشن ءِ دیوانءِ سرءَ چارءُ بچار کنگ بیت۔
