اسلام آباد ءِ 28بنیادی جان سلامتی مراگش آناں کارآمد جوڑ کنگ ءِ ھاترا کار برجاہ اِنت، وفاقی جان سلامتی ءِ وزیر ءَ پمز ءَ مراگش ءَ گشتانک

اسلام آباد۔7جولائی  (اے پی پی): وفاقی وزیر جان سلامتی مصطفیٰ کمال ءَ وفاقی دارالحکومت پمس ءِ نامداریں ہسپتال ءِ ایمرجنسی ڈیپارٹمنٹ ءَ نادراہ آنی آسراتی ءِ کمک سروس ءِ بندات ءَ را ہسپتال ءِ راجدپتر ءِ تہ ءَ یک ھاسیں سنگ میل لیک اتگ۔ آئی ءَ پیڈنٹ فیسیلیٹیشن اسسٹنٹ سروس ءِ بنگیج ءِ مراگش ءَ گوں تران کنان ءَ گوشت کہ 1984 ءَ پمز ءِ جوڑیشت ءِ وھد ءَ اسلام آباد ءِ آبادی ءِ کساس 7لکھ بوتگ کہ اے آبادی 5لکھ ءِ نزیک ءَ سر بوتگ۔ اے نادراھجاہ ءَ آزات کشمیر، گلگت بلتستان ءُ خیبر پختونخوا ءَ چہ آیوکیں نادراھ آناں ھم دوا ءُ درمان ءِ آسراتی دیگ بوھگ ءَ اِنت۔ پیسر ءَ روچے نزیک ءَ دو سد نادراہ پمز ءَ کاینت ءُ نوں اے کساس ھپت ھزار ءَ بگر داں نُھ ھزار ءَ سر بوتگ۔ 35 ءَ بگر داں 40 ہزار مردم ، ایشانی تہا سیاد ءُ وارث ہم ہوار انت ، روچے پمس ءَ ھوار انت کہ اے مزنیں مچی ءِ برابر انت۔ آئی ءَ گوشت کہ 7لکھ مردم آنی واستہ جوڑ بوتگیں نادراھجاہ نوں کروڑ آنی آبادی ءِ بار ءَ کشگ ءَ انت۔ وفاقی جان سلامتی ءِ وزیر ءَ گوشت کہ حکومت ءَ را راستی آنی چیر کنگ ءِ سر ءَ باور نہ اِنت ءُ اے گپ ءَ من ایت کہ استیں جاور ھال آئیڈیل نہ اَنت، انتظامی نزوری است اَنت، البت ایشانی ھلاسی ءُ نظام ءِ گہتری ءِ واستہ گامگیج کنگ بوھگ ءَ اِنت۔ مصطفیٰ کمال ءَ گوشت کہ پاکستان ءِ مستریں جیڈھ نزوریں بنجاہی جان سلامتی ءِ نظام انت، سردی، فلو ءُ تب ءِ وڑیں کسانیں نادراھی ءِ نادراہ آناں مزنیں ءُ ٹیچنگ ہسپتال آنی تہ ءَ آیگ ءِ ضلورت مہ بیت، بلے بنجاہی جان سلامتی مراگش آنی بے کار بوھگ ءِ سبب ءَ اے بار پمز ءِ وڑیں ہسپتال آنی سر ءَ کپ ایت۔ آئی ءَ گوشت کہ اسلام آباد ءِ 28 بنجاہی جان سلامتی مراگش آناں سرگرم جوڑ کنگ ءِ واستہ کار کنگ بوھگ ءَ انت تانکہ مزنیں اسپتال آنی سر ءَ دباؤ کم بہ بیت۔ آئی ءَ جار جتگ کہ پمز ءَ فیراپلس مشین چالو کنگ بوتگ، ایشی ءَ پد دل ءِ نادراہ آناں نوکیں علاج ءِ آسراتی مفت ءَ دیگ بنت ءُ اے درگت ءَ انتظامی پینگ ھم ھلاس کنگ بوتگ اَنت۔ وفاقی وزیر ءَ گوشت کہ پاکستان ءِ آبادی 265ملین ءَ چہ گوستگ ءُ ایشی ءِ تہ ءَ ھمک سال ءِ کساس 6.7ملین مردم گیشی بوھگ ءَ انت۔ آئی ءَ گوشت کہ ھر کوچگ ءَ نادراھجاہ ءِ ھست بوھگ ءَ ابید ھم گیش بوھوکیں آبادی ءِ سبب ءَ درستیں نادراھ آنی لوٹ آناں پیلو کنگ ممکن نہ اِنت پمیشکا علاج ءِ گوما نادراھی آنی گر ءُ دار ءِ سر ءَ دلگوشی دیگ المی اِنت۔ آئی ءَ گوشت کہ مردم آناں زھگ ءِ پیدائش ءِ تہ ءَ جوانیں وقفہ زورگ ءِ واستہ دلبڈی دیگ المی اِنت پرچا کہ آبادی ءِ تہ ءَ بے دروریں گیشی ءَ چہ جان سلامتی، وانگ ءُ زانگ ءُ ایندگر بنیاتی آسراتی آنی سر ءَ سک باز زور دیگ بوھگ ءَ اِنت۔ مصطفیٰ کمال ءَ گوشت کہ پاکستان ءَ ھمک سیمی مردم ذیابیطس ءِ نادراھی ءِ آماچ انت ءُ نزیک ءَ 68درسد نادراھی ساپیں آپ ءِ نہ بوھگ ءِ سبب ءَ ودی بنت۔ آئی ءَ گوشت کہ ساپیں آپ ءِ پھجاری ءِ زمہ واری وزارت جان سلامتی ءِ نہ انت بلکیں یک جوانیں بنجاہی حکومتی نظام ءِ زمہ واری انت۔ آئی ءَ گوشت کہ 18می آئین ءِ ترمیم ءِ مول ءُ مراد اختیارات ءُ وسیلگ آناں لس تک ءَ سر کنگ بوتگ بلے فیڈریشن ءَ چہ وسیلگ آناں صوبہ آناں دیم دیگ ءَ ابید ھم یونین کونسل ءِ تک ءَ تاں یک موثریں نظام ءِ جوڑ کنگ نہ بوتگ۔ آئی ءِ رد ءَ اگاں وسیلگ بنجاہی حکومت آنی گور ءَ سر بہ بنت گڈا ساپیں آپ، بنجاہی جان سلامتی مراگش، اسکول ءُ ایندگر بنیاتی آسراتی آناں جوانیں رنگ ءَ چلائینگ بوت کنت۔ فدرال وزیر ءَ گوشت کہ بنجاہی جان سلامتی ءِ مراگش ءُ اسکول آنی چلائینگ ءِ ذمہ واری یونین کونسل آنی بہ بیت۔ آئی ءَ گوشت کہ پولیو ءَ ھوار 13 نادراھی آنی ھلاپ ءَ ویکسین کنگ ءَ چہ الس ءَ را انکار کنگ ءِ یک مزنیں سبب بنجاہی تک ءَ جوانیں نظام ءِ نہ بوھگ اِنت۔ اگاں دمگی نمائندگ وتی چاگرد ءُ میتگاں سرگرم بہ بنت گڑا ویکسین ءِ رد کنگ ءِ وڑیں جیڑھانی سر ءَ چہ دیم ءَ شُت کنت۔ آئی ءَ اے گپ ءِ سر ءَ زور پر دات کہ جمہوریت ءِ بُن ھشت مھکمیں بنجاہی سرکار ءِ نظام اِنت بلے بدبھتی ءَ بازیں سالاں چہ بنجاھی سرکار ءِ گچین کاری نہ بنت ۔ آئی ءَ گوشت کہ ایوک ءَ لھتیں سد بیوروکریٹ سرجمیں نظام ءَ را چلائینت نہ کن اَنت وھدے کہ فعال بنجاہی حکومت ءِ نظام ءِ تہ ءَ بنجاہی تک ءَ راجی جیڈھ آنی گیواری ءَ لاکھوں مردم کرد پیلو کن اَنت۔ مصطفیٰ کمال ءَ گوشت کہ حکومت 18می ترمیم ءِ سرجمیں رنگ ءَ عمل درآمد ءِ واھشت مند اِنت تانکہ اختیارات ءُ وسیلگ راستی ءَ الس ءِ دروازگ ءَ سر کنگ بہ بنت ءُ جان سلامتی ءَ ھوار بنیاتی آسراتی آنی پھجاری ءِ تہ ءَ مزنیں گہتری آرگ بہ بیت۔