سیاسی جیڑھءُ جنجال ءُ مھکمی نہ بوھگءَ ابید ھم حکومت ءَ جوانیں کرد پیلو کتگ
اسلام آباد۔ 07فروری (اے پی پی) مزن وزیر شاہد خاقان عباسی ءَ گشتگ کہ پاکستان ءِ تہا ٹیکس ءِ بنیاتءَ را پراھءُ شاھگان کنگءِ ھوالگءَ نوکیں مردماناں ٹیکس نیٹ ءِ تہا آرگءِ ھاترءَ راجی پجّار ڈیٹا ءَ را کارمرز کنگءِ منصوبہ اِنت، ایشی ءِ تہا ٹیکس دزّیءَ را دارگ ، مالءُ مڈی ءِ راستیں ویلیوایشن ءِ دلبڈی ، انفرادی ٹیکس ءِ شرح ءِ تہا کمیءُ ایمنسٹی پروگرام ءَ را پیش کنگ ھوار اِنت۔ میاں اوستمانی ھال رسانکی ادارگ بلوم برگ ءَ را وتی داتگیں گلگودار ءِ تہا مزن وزیر ءَ گشتگ کہ مہ اے ھوالگءَ چہ حکمت عملی ءِ ردءَ کار کنگءَ اَنت۔ آئیءَ گشتگ کہ پیسہ جوڈ کنگ بیت بلے ھرچ دیر دیئگ نہ بیت، یوٹیلٹی بلز ، ڈنی سفرءِ معلومداری ءُ کریڈٹ کارڈ ءِ ھرچ ءَ چہ دراھیں جاورھال دیمءَ کااَنت۔ مزن وزیر ءَ گشتگ کہ پروگرام ءِ ردءَ پاکستانی آناں 10درسد ءِ بدلءَ 3درسد فیس ءِ اداکنگءَ چہ وتی دولتءِ پدر کنگءِ دلبڈی بیت۔ ایشی ءَ ابید حکومت ٹیکس آں چہ رکھگ ءِ ھاترءَ پراپرٹی ءِ پڑءَ بوتگیں زرکاری ءَ را ایر جنگ ءِ ھاترءَ پراپرٹی ویلیوایشن ءِ نظام ءَ را گہتر جوڈ کنت۔ مزن وزیرءَ یک جستے ءِ پسوءَ گشتگ کہ پنچ سال پیسر پاکستان ءِ جی ڈی پی ءِ شرح نمو 3درسد ءَ چہ کم بوتگ کہ نو 5درسد ءِ نزیک اِنت وھد ے کہ آؤکیں مالی سال ءِ تہا مہ 6درسد ءَ چہ گیش شرح نمو ھاصل کن اَنت۔ آئیءَ گشتگ کہ سیاسی جیڑھءُ جنجال ءُ مھکمی ءِ نہ بوھگءَ ابید ھم حکومتءَ جوانیں کرد پیلو کتگ۔
