کشمیر ی اُلس ءِ واھشتانی ردءَ کشمیرءِ جیڑھ ءِ گیشءُ گیواری دمگی ءُ میاں اوستمانی امنءُ ایمنی ءُ مھکمی ءِ ھاترءَ جوان اِنت، ایا ز صادق
پاکستان ءِ مزن گس ءَ کشمیرءِ جیڑھ ءَ را امن ءُ ایمنی ءَ گوں گیش ءُ گیوار کنگءَ جزم کتگ، مرتضیٰ جاوید عباسی
راجی اسمبلی ءِ اسپیکرءُ ڈپٹی اسپیکرءِ کشمیر ءِ یکوئی ءِ روچءِ درگتءَ بیان
اسلام آباد۔05فروری (اے پی پی ) راجی اسمبلی ءِ اسپیکرایاز صادقءَ گشتگ کہ کشمیر ی اُلس ءِ واھشتانی ردءَ کشمیرءِ جیڑھ ءِ گیشءُ گیواری دمگی ءُ میاں اوستمانی امنءُ ایمنی ءُ مھکمی ءِ ھاترءَ جوان اِنت، کشمیر ءِ جیڑھ نہ تنا یک دمگی جیڑ ھ نہ اِت بلکیں وت واجہی کشمیرءِ اُلس ءِ بنکی حق اِنت۔ دوشمبے ءِ روچءَ کشمیرءِ یکوئی ءِ روچءِ درگتءَ وتی بیانءِ تہا آئی ءَ گشتگ کہ کشمیرءِ تہا تہا زورءُ طاقتءِ کارمرزءَ چہ آجوئی ءِ آشوب نہ چیر دیئگ بہ ءُ نہ اے جیڑھءِ سرءَ پاکستانءِ اصولی مٹ کنگ بنت۔ راجی اسمبلی ءِ اسپیکرءَ گشتگ کہ جنوبی ایشیا ء ءِ تہا تاں اے وھدءَ امنءُ ایمنی ءِ واب پیلو بوت نہ کنت وھدے کہ دنیاءِ درساں چہ مستریں ھشکیں نام ءِ جمہوریت بھارت کشمیرءِ تہا زُلمءُ ناھکیءَ بند نہ کت۔ آئی ءَ گشتگک ہ میاں اوستمانی براتی ءِ بھارت ءِ نیمگءَ چہ اقوام متحدہ ءِ تپاک نامہ ءِ نہ منگءُ کشمیرءِ تہا زُلمءُ ناھکی ، دروگیں مقابلہ ، آوار جنگ، زالبولاں بے شرپ کنگءُ معصومیں شہرآناں جنگءُ ٹپیگ کنگ ءَ ھم ھاموش ءُ ندارگ چارگءَ اِنت۔ سردار ایاز صادق ءَ گشتگ کہ گوستگیں سال دسمبر ءَ بوتگیں اولی 6ملکی اسپیکر کانفرنس ءِ تہا پاکستانءَ ابید روس، چین ، ترکی ، ایران ءُ اوگانستان ھوار بوتگ اَنت ءُ یکوئیءَ وتی جارءِ تہا کشمیرءِ جیڑھءَ را میاں اوستمانی امنءُ ایمنی ءُ مھکمی ءِ ھاترءَ قوام متحدہ ءِ سکیورٹی کونسل ءِ تپاک نامہ آنی ردءَ گیشءُ گیوار کنگءِ ضلورتءِ سرءَ زور پِرداتگ۔اے موھءِ سرءَ ڈپٹی اسپیکر مرتضیٰ جاوید عباسی ءَ وتی یک بیان ءِ تہا گشتگ کہ پاکستان ءِ مزن گس کشمیر ءِ جیڑھءِ امنءُ ایمنیں گیشءُ گیواری ءِ ھاترءَ جزم کتگ ءُ اے ھوالگءَ مزن گسءَ کشمیرءِ جیڑھءَ را اقوام متحدہ ءِ سکیورٹی کونسل ءِ تپاک نامہ آنی ردءَ گیش ءُ گیوار کنگءُ مقبوضہ کشمیر ءِ تہا بھارتی اُردانی نیمگءَ چہ استیں زُلمءُ ناھکی ءَ دارگءِ ھاترءَ بازیں تپاک نامہ من اِتگ، پاکستان معصومیں کشمیر ی اُلس ءِ توار اِنت ءُ مصیبت ءِ ھمک ساھتءَ آھانی گوما ھم کوپگ اِنت ۔
