اسلام آباد ۔04 فروری (اے پی پی) مزن وزیر شاہد خاقان عباسی ءَ یک شمبے ءِ روچ ءَ چترال ءَ گولن گول ہائیڈرو پاور پراجیکٹ ءِ اولی فیز ءِ بنگیجی کت ایشی ءَ چہ 36میگاواٹ توان پیداک بیت وھدیکہ منصوبگ ءِ ھواریں پیداوار کساس 108میگاواٹ انت۔ بنگیجی مراگش ءَ گوں گشتانک دیان ءَ مزن وزیر شاہد خاقان عباسی ءَ گوشت کہ اے منصوبگ سرجمیں سال ءَ اینکیاستوان ضلور پیداک بیت ایشی ءَ چہ چترال ءُُ کش ءُُ کر ءِ دمگ آں توان ءِ ضلورت سرجم بیت ءُُ چترال ملک ءِ ھما ایوکیں جاھ اِنت کہ آھودا لوڈ شیڈنگ نہ بیت۔ آئی ءَ گوشت کہ دریائے مستوج ءِ سر ءَ جتگیں توام پیداک کنگ ءِ گولن گول پراجیکٹ سرجمیں سال ءَ توان پیداک کنت، ایشی ءَ چہ سرجمیں چترال ءَ توان رسیت ءُُ آھوادا توان ءِ آسراتی بیت ھمک دمگ ءَ پجاری بیت۔ آئی ءَ گوشت کہ منی سیادی ھم ھمے رنگ کوھی ءُُ گر ءُُ تنکیں گٹ آنی دمگ آں گوں است اِنت منی دمگ ءَ بازیں یونین کونسلز آنی تہ ءَ توان نیست۔ چیا کہ اے رنگیں دمگ آنی تہ ءَ توان ءِ پُجاری ءِ واستہ سک باز ھرچ ءُُ درچ کئیت۔ آئی ءَ گوشت کہ چترال ءَ چہ باسک قومی اسمبلی شہزادہ افتخار الدین ءِ اے شری اِنت آ وتی زات ءِ واستہ ناں بلکینگ ءَ سرجمیں دمگ ءُُ الس ءِ گہبود ءِ واستہ کار کنگ ءَ اِنت ءُُ آئی ءَ ملک ءِ ایندگہ دمگ آنی مٹ ءَ گیش دیمروئی کار کنائینتگ اَنت۔ مزن وزیرر ءَ گوشت کیہ چترال ءَ لواری ٹاپ ءِ منصوبگ ءِ بنگیج 1973ءَ ذولفقار علی بھٹو ءَ کتگ بوتگ ایش 44سال ءَ پد مسلم لیگ (ن) ءِ حکومت ءَ سرجم کتگ۔ آئی ءَ گوشت کہ ھرچ حکومت ایوک ءَ سوگند ، کرار ءُُ ایوک ءَ گپ کن اَنت آواں گوں مارا ھمے جتائی است انت ما منصوبگ بندات کنان ءَ ایشرا وھد ءُُ پاس ءِ سرءَ سرجم کنا ں۔ آئی ءَ گوشت کہ توان ءِ پیداک کنگ ءِ اے منصوبگ چترال ءِ الس ءِ وستہ حکومت ءِ نیمگ ءَ چہ ٹوھیں سوگات اِنت ءُُ چترال ءِ دمگ ءِ ضلورت ءَ چہ گیش تو ان ملک ءِ ایندگہ دمگ آناں دیگ بیت۔ آئی ءَ گوشت کہ چترال ءَ آپی آسراتی ءَ چہ 10ءَ چہ 12ہزار میگاواٹ توان پیداک کنگ ءِ طاقت اَست بلے ایشی ءَ چہ نپ ءُُ سیت چست کنگ ءِ ھاترا وھد پکار اِنت۔ مزن وزیر ءَ اے امیت سہرا کت کہ چترال ءِ الس ایندگہ منصوبگ آنی وھد ءُُ پاس ءِ سرءَ سرجمی ءَ کمک کنت ایشی ءِ واستہ حکومت ھم ھمک رنگ ءِ کمک کنت۔ مزن وزیر ءَ منصوبگ آنی اولی برھ ءِ وھد ءُُ پاس ءِ سرءَ سرجمی ءِ پد ءَ چیئر مین واپڈا ءُُ آئی ءِ ٹیمب، چینی زانتکار ، سعودی فنڈ ءَ ھوار ایندگہ بھر زوروکیں ادارگ آنی شگر ءُُ منت گپت ءُُ گوشت کہ آئی ءَ دور ءُُ گستائیں دمگ آنی تہ ءَ سک باز ازمت ءُُ جوانیں کرد ءِ پد ءَ منصوبگ سرجم کت اَنت ایشی ءَ چہ دمگ ءُُ پاکستان ءِ الس ءَ را وشھالی رسیت۔ مراگش ءَ چیئرمین واپڈ ءَ ھوار منصوبگ ءِ ایندگہ شریکیں ادارگ آنی نماھندگءُُ ٹوھیں کارندہ ھم ساڑی اتنت۔
