لاہور۔2فروری ( اے پی پی) مزن وزیر شاہد خاقان عباسی ءَ گشتگ کہ آرکیٹیکچرز ءَ را تعمیرائی میراث ءِ پللگاری ءُ بحالی ءِ سرءَ سرجمءَ دلگوشی کنگءِ ضلورت اِنت، ھاس کوالٹی ءُ معیارءِ سرءَ ایچ وڈیں من ءُ گر کنگ مہ بیت، پاکستان ءِ تہا تعمیر ءِ ازم سک باز اِنت، مغل آنی دورءَ ایشی ءِ سرءَ باز کار بوتگ ءُ آھانی تعمیراتی میراث باز جوانیں درور اِت، اے وھدءَ ملک ءِ تہا آرکیٹیکچرز ءِ باندات سک باز روژناھ اِنت۔ اے ھیالانی درشانی آئیءَ جمعہ ءِ روچءَ ’’ بلڈنگ میڑیل اینڈ پروڈکٹس ایکسپو 2018‘‘ ءِ بنگیجی مراگشءَ تران کنانءَ کتگ۔ اے موھءِ سرءَ ملکی وزیر مریم اورنگزیب ، صدر انسٹیٹیوٹ آف آرکیٹیکٹس پاکستان علی ظفر، سلیم ریاض ءُ یوسف غوری ھم ساڑی بوتگ۔ شاہد خاقان عباسی ءَ نماش کنگءَ منتظمین ءَ ر امراد بات پیش کتگءُ گشتگ کہ آرکیٹیکچرآں ملکءِتہا تعمیر ءِ ازم ءَ را باز بدر کتگءُ آرکی ٹورزم ایشی ءِ یک درور اِت۔ مزن وزیر ءَ گشتگ کہ سالاں سال بازیں تعمیراتے بوتگ بلے آرکیٹیکچرءِ نیمگءَ چہ جوانیں دلگوشی کنگ نہ بوتگ، کم نیاد ہاؤسنگ ءِ بزانت اے الم نہ اِنت کہ کوالٹی کم بہ بیت۔ محنت ، دلجمی، یکوئی ءُ سرجمیں دلگوشی ءِ وسیلگءَ کم نیادءَ چہ گہتریں ءُ معیاری تعمیرات بوت کنت ءُ نتیجگ ھم جوانیں دیمءَ کا اَنت۔ شاہد خاقان عباسی ءَ گشتگ کہ بانداتءَ تعمیرءِ ازم ءِ پڑءَ باز دیمروئی بیتءُ ملک ءِ تہا باز جوانیں ماڑی گندگءَ کیئت ھمے ھاترءَ پاکستانءِ تہا آرکیٹیکچر ءِ باندات باز روژناھ ءُ گہتر بیت۔ مراگشءِ گڈی بھرءَ چیئرمین انسٹیٹیوٹ آف آرکیٹیکٹس پاکستان یوسف غوری ءَ مزن وزیر شاہد خاقان عباسی ءَ را سوینئر پیش کتگ۔
