اسلام آباد۔یکم فروری (اے پی پی) مزن وزیر شاہد خاقان عباسی ءَ گشتگ کہ حکومت ملک ءِ تہا بیپار کنگءَ ارزانی پیداک کنگءِ ھاترءَ کار کنگءَ اِنت، مردم وتی زرکاری ءَ وتی ملک ءَ آرگ ءُ معیشت ءِ پیداواری پڑآنی تہا زرکاری کنگءِ دلبڈی کنگءِ ھاترءَ یک پالیسی ءِ سرءَ چارءُ بچار کنگ ءَ اِنت ، ٹیکس آنی تہا کمی ءِ سوج ءِ سرءَ چارءُ بچار کنگ بوھگءَ اِنت۔ آئیءَ اے گپ صنعتءُ بیپارءِ بنجاھی ایوان ءِ ڈلءَ گوں گپءُ تران کنانءَ کتگ کہ آھاں پنچ شمبے ءِ روچءَ وتی صدر غضنفر بلور ءِ سروکیءَ مزن وزیر کارگس ءَ گند ءُ نند کتگ۔ بیپاری براتیءِ باز یں جیڑھءُ جنجالانی سرءَ گپ کنانءَ ڈلءِ باسکاں بیپاری براتی ءِ ھاترءَ گیش آسراتی، ھرچ کم ءُ زرکارانی اوستءَ را گیش کنگءَ ھوار ملکی بیپاری آسراتی ءَ راگیش کنگ ءُ ھاس میاں اوستمانی شریداری ءُ ادارگ آنی گوما بیپاری ءِ گیشی کنگءِ ھاترءَ گامگیج ءِ ھوالگءَ بازیں سوجے داتگ۔ مزن وزیر ءَ ڈل ءَ را وش اَتک کتگءُ ایف پی سی سی آئیءِ نوک گچین بوتگیں عہدگ داراناں مراد بات داتگ۔ آئی ءَ بیپاری براتی ءِ آسراتی ءِ ھاترءَ حکومت ءِ نیمگءَ چہ چست کتگیں گامگیجانی زکر کتگءُ گشتگ کہ حکومت ملک ءِ تہا بیپاری گہتری ءِ ھاترءَ گامگیج کنگءَ اِنت۔ مز ن وزیر ءَ گشتگ کہ نجی پڑ ءَ را ملکی برآمدات ءِ تہا گیشی کنگءِ ھاترءَ کرد پیلو کنگ لوٹ ایت۔ آئیءَ گشتگ کہ حکومت نجی پڑءِ سوجاناں وش اَتک کنتءُ بیپاری براتیءَ را ھمک بوھوکیں آسراتی ءَ سرکنت۔
