پاکستان دراھیں ملک آنی گوما براتیں ءُ دوستیں سیادی لوٹ ایت، ممنون حسین
اسلام آباد۔یکم فروری (اے پی پی ) ملک ءِ صدر ممنو ن حسین ءَ را ترکی ، جنوبی کوریا ءُ ملائیشیا ءِ سفارت کاراں پنچ شمبے ءِ روچءَ وتی سفارتی کاگد پیش کتگ اَنت ءُ آئی ءِ گوما جتاھ جتاھ گندءُ نند کتگ۔ اے ھوالگءَ پنچ شمبے ءِ روچءَ ایوان صدرءَ یک پُرمڈاھیں مراگشے بوتگ۔ سفارتی کاگد پیش کنوکیں سفارت کارانی تہا ترکی ءِ سفیر احسن مصطفی یرداکلی، کوریاءِ سفیر کواک سنگ کیوءُ ملائیشیا ءِ ہائی کمشنر اکرام بن محمد ابراہیم ھواربوتگ اَنت۔ اے موھءِ سرءَ ملک ءِ صدر ممنون حسین ءَ گشتگ کہ پاکستان دراھیں ملک آنی گوما براتیں ءُ دوستیں سیادی لوٹ ایت۔ آئیءَ اُمیت درشان کتگ کہ پاکستانءِ تہا استیں سفارتکار دونیمگی سیادی ءِ گیشی ءِ ھاترءَ وتی سرجمیں کردءَ را پیلو کن اَنت۔ آئیءَ گشتگ کہ انوگیں حکومت ءِ گہترمعاشی پالیسی ءِ سوبءَ چہ پاکستانءِ تہا زرکاری ءِ گہتریں موھ اَست اَنت۔ ایشی ءَ چہ پیش ھرچ ملک ءِ نامینتگیں سفیر ءَ را یک پہ یک ءَ ھپس گاڑی ءِ سرءَ ایوان صدرءِ بنجاھی دروازگءَ آرگ بوتگ کہ آھودہ آئیءَ را گارڈ آف آنر پیش کنگ بوتگ۔ اے موھءِ سرءَ ھمگرنچیں ملک ءُ پاکستانی راجی صوت ھم پیش کنگ بوتگ۔
