گوادر ۔ 29 جنوری (اے پی پی) مزن وزیرشاہد خاقان عباسی ءَ گوشت کہ چین پاکستان اقتصادی راہداری (سی پیک) ٹوھیں بے مٹیں منصوبگ گواچنی رنگ آرگ ءَ اِنت، ایشی ءَ چہ نا ایوک ءَ پاکستان بلکینگ ءَ نیامی ایشا ءَ ھوار سرجمیں پڑ ءَ دمگی رابطہ آناں دیمروئی رسیت۔ اے منصوبگ ءَ را سرجمیں پڑ ءِ واستہ یک گیم چینجر ءِ سسا کن آں، فری زون ءَ ابید اِچ دکہ نپ ءُُ سیت ئی نہ بیت، گوادر پورٹ ءُُ فری زون ءِ جوڑیشت ءَ چہ بلوچستان ءِ گوما پاکستان دیمروئی ءِ کشک ءَ راھ کپ ایت، پاکستان مسلم لیگ (ن) ءَ دیمروئی منصوبگ آناں سیاسی مٹ ءُُ بدلی ءِ کار ءَ چہ جتا کتگ۔ جولائی ءَ لس گچین کاری بنت، دل یکیم آں آیوکیں حکومت ھم دیمروئی ءِ رچ ءَ برجا دار انت۔ آئی ءَ اے ھیالانی درشانی دو شمبے ءَ ادا دو روچی میاں اوستمانی گوادر ایکسپو ءِ بنگیجی مراگش ءَ تران کنگ ءَ کت۔ میاں اوستما نی نماش ءَ در ملکی بامرد، در ملکی سفیر ءُُ سرجمیں دگنیا ءَ تاجر نماھندگ شریک بنت۔ اے موہ ءِ سر ءَ گوادر فری زون ءِ اولی بھر ءِ بندات بوھگ ءَ اِنت ایش چین پاکستان اقصادی راہداری گیٹ وے ءِ سر ءَ برجا کنگ بوتگ۔ فری زون ءَ چہ نیامی ایشیا ءَ ھوار دُگنیا ءِ جتا جتائیں بھر آنی تہ ءَ تجارت ءَ را دیمروئی رسیت۔ ایکسپو 2018ءِ مول ءُُ مراد گوادر دکہ ءُُ گوادر فری زون ءِ لھڈ بوھوکیں تجارتی بُنزیاھ ءِ رنگ ءَ سہرا کنگ ءُُ گواسدر ءِ منصوبگ ءَ چہ پیداک بوھوکیں موہ آنی بابت ءَ سرپدی پیداک کنگ اِ نت۔ مزن وزیر شاہد خاقان عباسی ءَ گوشت کہ گوادر ءَ اولی دو روچی میاں اوستمانی نماش ءُُ فری زون ءِ بنگیج ءَ کنان ءَ آئی ءَ را سک باز وشی بوھگ ءَ اِنت۔ مزن وزیر ءَ گوشت کہ لستیں روچ ءَ ڈیووس میں میاں اوستمانی اقتصادی فورم ءِ موہ ءَ یکجائی آیوکیں باندات ءُُ چیلنجز ءِ موہ ءَ ھم گپ ءُُ تران بوت ایشی ءِ تہ ءَ دمگی رابطہ آناں گیش مھکم کنگ ءِ سرءَ زور دیگ بیت۔ آئی ءَ گوشت کہ گوادر پورٹ، گوادر فری زون، ایکسپریس ویز، موٹر ویز ءُُ ریل ءِ دیمروئی ءِ منصوبگ گوادر، خنجراب ءُُ پشاور ءَ را کراچی ءَ گوں ملارینگ بیت۔ اے ناں ایوک ءَ مئے وشھالی ءُُ مھکمی ءُُ آیوکیں باندات ءِ منصوبگ اَنت بلکینگ ءِ اے مارا مھکمیں ھاٹیگ ءِ آیوکیں باندات ءَ ھم دینت۔ مزن وزیر ءَ دل یکیمی دات کہ استیں حکومت ءَ اے منصوبگ ءَ ھما ارزشت داتگ آیوکیں حکومت ھم ھمے رچ ءَ برجا دار انت۔ آئی ءَ سی پیک ءُُ گوادر ءِ منصوبگ آنی پکوئیں رنگ دیگ ءِ ھاترا چینی سفیر ءُُ بُنجاھی وزیر منصوبگ بندی احسن اقبال ءِ کوشست آنی تران کت ءُُ گوشت کہ پاکستان ءُُ چین ءِ کوشست آں چہ اے منصوبگ سرجم بیت۔ سر وزیر بلوچستان عبدالقدوس بزنجو ءَ را دلگوش کنان ءَ مزن وزیر ءَ گوشت کہ ھما جیڈھ آنی بابت ءَ تران کنگ بوتگ ایشانی گیواری کوشست کنگ بیت۔ مزن وزیر ءَ گوشت کہ بلوچستان ءِ آیوکیں باندات بلوچستان ءِ سیاسی سروک آنی دست ءَ اِنت، بلوچستان ءِ سروک آنی جیڈھ آناں گیوار کنگ بیت، بُنجاھی حکومت اے رد ءَ کمک پُجاری کنت۔ اے پیکیج آں چہ صوبگ ءَ دیمروئی زوت بیت۔ مراگش ءَ وزیر ءِ توکی کار پروفیسر احسن اقبال، سر وزیر بلوچستان عبدالقدوس بزنجو، بُنجاھی وزیر میری ٹائم افیئر ز میر حاصل خان بزنجو ءُُ چینی سفیر یاؤجنگ ءَ ھم گشتانک دات۔ مراگش ءَ گورنر بلوچستان محمد خان اچکزئی، دکہ ءُُ بالیگ آنی بُنجاھی وزیر جعفر اقبال، وزیر اھوالکاری ءُُ شنگ کاری مریم اورنگزیب ، در ملکی بامرد، سفارتکار ءُُ جتا جتائیں ملک آں گوں سیادی داروکیں نماھندگ کاروباری بامرد ءُُ ٹوھیں السی ءُُ اردی مردم آں بھر زوری کت۔ ایشی ءَ چہ پد مزن وزیر ءَ بٹن جت ءُُ میاں اوستمانی گوادر ایکسپو ءِ بنگیج کت۔
