اسلام آباد۔28جنوری (اے پی پی ) مزن وزیر شاہد خاقان عباسی ءَ گشتگ کہ ملک ءِ تہا جمہوریت دیمءَ رھادگ اِنت ، جولائی ءَ لھس گچین کاری بنت، گچین کاری ءِ تہا اُلس وتی ھیال ءُ لیکہءَ چہ نوکیں حکومت ءِ پیسلہ ءَ کنت، دیمروئی منصوبہ سیاسی ءُ حکومتی مٹ ءُ بدلی ءَ تہا بُرزتر بوھگ لوٹ اَنت، دلجمی ءُ محنت ءِ گوما کار کن اَنتءُ جمہوریتءَ را دیم روئی دیئگ ءَ پاکستان دیمروئی کنت، ھمے سبک قائداعظم ءَ داتگ ءُ ھمے پاکستانءَ را دیمروئی دنت۔ یکشمبے ءِ روچءَ کراچی ءَ لیاری ایکسپریس وے نارتھ باؤنڈ کیرج وے ءِ دیم درائی کتگءُ مزن وزیر ءَ گشتگ کہ آئی ءَ را اے منصوبہ ءِ دیم درائی کنگءَ باز وشی بوھگءَ اِنت ، لیاری ایکسپریس وے ءِ منصوبہ سکیں مزنیں ءُ دراج بھریں منصوبہ اِت، اے منصوبہ بازیں جیڑھ ءُ جنجالانی آماچ بوتگ ۔ مزن وزیر ءَ گشتگ کہ مئے کوشست اِنت کہ دیمروئی منصوبہ سیاسی ءُ حکومتی مٹءُ بدلی ءَ چہ بُرز تر بہ بیت تنکہ ملک ءِ تہا دیمروئی ءِ سفر جاری بہ بیت ۔ مزن وزیر ءَ گشتگ کہ موٹرویز ءِ منصوبہ پاکستان ءِ معیشت ءَ را مٹ کنت، ایشی ءِ تہا نہ تنا پاکستان بلکیں وسطی ایشیا ء اوگانستان ءُ خطہ ءِ دگہ بازیں ملک آناں پاھدگ سر بیت۔ آئیءَ گشتگ کہ چین ءِ قیادت ءِ بیلٹ اینڈروڈ گامگیج دمگی مربوطیت ءِ منصوبہ اِنت کہ ایشی ءَ چہ درساں پاھدگ سر بیت۔ آئیءَ سندھ ءِ صوبائی حکومت ءَ را شہرءِ گہتری ، دیمروئی ءُ وشھالی ءِ ھاترءَ سرجمیں کمک ءِ اوست داتگ۔ ایشی ءَ چہ پیش مزن وزیر ءِ تکتی ءِ دیم درائی کتگءُ لیاری ایکسپریس ءِ بندات کتگ۔ اے موھءِ سرءَ گورنر سندھ محمد زبیر، سروزیر سید مراد علی شاہ، مواصلات ءِ بنجاھی وزیر حافظ الکریم، ھالءُ اھیوال کاری ءُ شنگاری ءِ وزیر مریم اورنگزیب، پٹرولیم ءِ ملکی وزیر جام کمال خان ، مزن وزیر ءِ ھاسیں کمک کار ڈاکٹر مصدق ملک ، مفتاح اسماعیل ، کورکمانڈرکراچی، ڈی جی رینجرز ، چیئرمین ایف ڈبلیو ءُ چیئرمین این ایچ اے ءُ دگہ مزنیں حکام ھم ساڑی بوتگ اَنت۔ زانگ بہ بیت کہ دیم درائیءَ پد لیاری ایکسپریس وے ءِ منصوبہ سرجم ءَ فعال بیت۔ منصوبہ ءِ ریمپس ءَ ھوار مُچ دراجی 38کلومیڑ اِنت کہ ایشی ءِ سرءَ 10ارب کلدارءِ ھرچ اَتگ۔ ایشی ءِ تہا سہراب گوٹھ ، منگھو پیر ، سرشاہ سلیمان ءُ ماڑی پور ءَ ھوار چار انٹرچینجز ھوار اَنت۔ ایشی ءِ گوما 20مزنیں پُل ھم منصوبہ ءِ بھر اَنت۔اے منصوبہ شہر ءِ تہا گشادی ءِ گوما گیش بوتگیں ٹریفک ءِ ھاترءَ باز جوان اِنت۔ کراچی ءِ دھکہ ءُ مزن شاہ دگ ( ایم 9) ءَ چہ آؤکیں ٹریفک شہرءَ داخل بوھگءِ دلءَ وتی منزل ءَ سربوھگءِ ھاترءَ ایکسپریس وے ءَ ر ا کارمرز کنت وھدے کہ منصوبہ ءَ چہ دریا ءَ ھوار ھورءُ ھار ءِ نقصان ھم گرءُ دار کنگ بنت ءُ ایشی ءَ چہ سرجمیں دمگ ءِ تہا ماحولیاتی پلگارگءَ ر اکمک رسیت۔
