اسلام آباد ۔ 26 جنوری (اے پی پی) پاک بحریہ ءِ جہاز پی این ایس نصر ءُُ پی این ایس خیبر ءَ کینیا ءِ دکہ ممباسا ءُُ تنزانیہ ءِ دکہ دارالسلام ءِ تر ءُُ تاب کت۔پاک بحریہ ءِ اے جہاز رودراتکی افریقی ملک ءُُ بحرِ ہند ءِ زرناپی ملک آنی ’’خیرسگالی‘‘ تر ءُُ تاب ءَ اِنت۔ اے خیر سگالی ءُُ ھیل کارری تر ءُُ تاب آنی مول ءُُ مراد رودراتکی افریقہ ءِ دوستیں ملک ءُُ پاکستان ءِ نیام ءَ دوستگیں یکوئی آناں گیش گہتر کنگ ءُُ حکومت ءِ پاکستان ءِ درئی پالیسی آنی مول ءُُ مراد آنی در جنگ ءَ کرد پیلو کنگ اِنت۔ اے مول ءُُ مراد آنی در جنگ ءِ واستہ پاک بحریہ ءِ جہاز استیں وھد ءَ سیشلز ءِ دکہ وکٹوریا ءُُ ماریشیئس ءِ دکہ لوئس ءِ تر ءُُ تاب کتگ اَنت۔ تنزانیہ ءُُ کینیا ءِ دکہ آنی سرءَ سر بوھگ میزبان بحری اُرد آں جہاز آناں وش اتک کت۔ تنزانیہ ءَ سر بوھگ ءِ موہ ءَ تنزانیہ ءِ نیوی ءَ وتی آپی جہاز ٹیمبو تنزانیہ ءِ گورم آنی تہ ءَ روان دات ءُُ پی این ایس خیبر ءَ را وش اتک کت۔ پی این ایس خیبر ءِ پُجگ ءَ پد تنزانیہ نیوی ءِ اپسرگ و سیلرز ءَ تنزانیہ ءَ پاکستان ءِ نیول اینڈ ایئر ایڈوائز ءُُ پاکستانی ہائی کمیشن ءِ ایندگہ کارندھ آنی ھمبراھی ءَ پی این ایس خیبر ءَ را وش اتک کت۔ کینیانیوی ءِ دستہ آں لس میزبانی ءِ رپک ءَ پی این ایس نصر ءَ را وش اتک کت۔ زرّباری افریقہ ءَ پاکستان ءِ دیمپانی مشیر ءُُ پاکستان ہائی کمیشن نیروبی ءِ ٹولہ ھم اے موہ ءَ ساڑی اتنت۔ ممباسا دکہ ءِ جوڑ کنگ ءِ ساھت ءَ پاک بحریہ ءِ مشن کمانڈر ، کموڈور جاوید اقبال ءَ پی این ایس نصرءِ کمانڈنگ آفیسر ءِ ھمبراھی ءَ کمانڈر کینیا نیوی بیس مٹونگوے بریگیڈیئر وی ایل نائیشو، ممباسا ءِ گورنر حسن علی جوہو ءُُ ممباسا ءِ کنٹری کمشنر ایون اچوکی ءَ گوں گند ءُُ نند کت۔ پی این ایس خیبر ءِ کمانڈنگ آفیسر ءَ تنزانیہ ءِ جتا جتائیں ٹوھیں کارندہ آں گوں گند ءُُ نند کت۔ اے کارندہ آنی تہ ءَ تنزانیہ پیپل ڈیفنس فورسز ءِ چیف، جنرل کیویو، کمانڈر تنزانیہ نیوی، ریئر ایڈمرل رچرڈ متایوبا ءُُ تنزانیہ پیپل ڈیفنس فورسز ءِ نگران چیف آف آپریشنز اینڈ ٹریننگ، بریگیڈیئر جنرل ایچ ایس کمندے ھوار اتنت۔ اے گند ءُُ نند آنی ساھت ءَ دوئیں ملک آنی بامرد آں میاں اوستمانی گورم آنی تہ ءَ ناشرکاری ءُُ زرّئی دُنگ آنی گر ءُُ دار ءِ ھاترا کتگیں آپریشنز آنی تہ ءَ یک شل ءَ بھر زوری ءِ وسیلگ ءَ برجائی ءِ رکھینگ ءَ پاک بحریہ ءِ کرد ءِ توسیپ کت۔ جوانیں واھگ آنی درشان ءِ رنگ ءَ پاک بحریہ ءِ دوئیں جہاز آنی کارندہ آں تر ءُُ تاب کنوکیں دکہ آنی سر ءَ ھیراتی چست ھم برجا کت۔ پی این ایس خیبر ءِ آفیسرز ءُُ سی پی اوز/سیلرز ءَ کیگمبونی کمیونٹی آرفنج ءُُ کیگمبونی ہیلتھ سنٹر ءِ تر ءُُ تاب کنان ءَ وردنی چیز ءُُ سوگات بھر ءُُ بانگ کت۔ پی این ایس نصر ءِ اپسرگ ءُُ سی پی اوز/سیلرز آں نور آرفنج ءُُ لٹل سسٹرزآف دی پوئرز ءِ تر ءُُ تاب کت ءُُ ورگ ءُُ نوشگی چیز ، سکول ءِ بستہ ’’بیگز‘‘ ءُُ اسٹیشنری ءِ چیز بھر ءُُ بانگ کت اَنت۔ روادگی ءَ چہ پیسر کراچی ءَ تیار کتگیں دوا ءُُ درمان آنی ڈبہ ھم ھندی شہری حکومت ءِ نماھندگ آنی ھوالگ ءَ کت اَنت۔ دکہ آنی برجائی ءِ ساھت ءَ جہاز آنی سر ءَ ورگ ءُُ نوشگ ءِ بندوبست کنگ بوت ایشانی تہءَ بازیں ملک آنی سفیر، دیمپانی کارندہ ءُُ ارزشتی ایں پاکستانی بامرد آں بھر زوری کت۔ پاک بحریہ ءِ جہاز آنی اے تر ءُُ تاب دوئیں ملک آنی نیام ءَ استیں یکوئی آناں پکوئی ءَ گیش مھکم کنگ ءِ سبب سہرا بنت۔
