ڈیووس ۔ 25 جنوری (اے پی پی) مزن وزیر شاہدخاقان عباسی ءَ گوشت کہ پاکستان ءَ را چین ءِ سروکی ءَ ’’ون بیلٹ ون روڈ‘‘ گامگیج آنی بھر جوڑ بوھگ ءِ شرپ گون اِنت، پاک چین اقتصادی راہداری ءَ چہ بازیں ملک آناں روزگار ءِ موہ، صنعتی دیمروئی ءُُ رابطہ ءَ گہتری ءِ رنگ ءَ نپ رسیت، پاکستان ءَ جمہوریت ءِ مھکمی یک جوانیں ءُُ وشیں کلوہ ءِ نیمگ ءَ گواچن اِت ءُُ توامیں ادارگ آناں یکجاھ بوھگ ءُُ یک مشتی ءَ دیمروئی ءُُ برجائی ءِ واستہ کار کنگ لوٹ ایت۔ اے ھیالانی درشانی آئی ءَ پنچ شمبے ءِ روچءَ ادا سویٹزرلینڈ ءِ شہر ڈیووس ءَ میاں اوستمانی اقتصادی فورم ءِ موہ ءَ پاتھ فائنڈرگروپ ءِ نیمگ ءَ چہ ارزبند ءِ ساھت ءَ میٹنگ ءَ تران کنان ءَ کت۔ اے موہ ءِ سرءَ پاکستانی تاجر ، میڈیا ءِ نماھندگ ءُُ بازیں ملک آں چہ ’’پاکستان ءِ دوست‘‘ ھم ساڑی اتنت۔ مزن وزیر ءَ چینی سروک ءِ ون بیلٹ ون روڈ گامگیج ءِ وژن ءِ توسیپ کت ءُُ گوشت کہ مارا چینی سروک ءِ ’’ون بیلٹ ون روڈ‘‘ گامگیج آنی بھر بوھگ ءِ شرپ گون اِنت، پاک چین اقتصادی راہدارری ءَ چہ بازیں ملک آناں روزگار ءِ موہ رسیت، صنعتی دیمروئی ءُُ رابطہ ءَ گہتری ءِ رنگ ءَ نپ رسیت۔ مزن وزیر ءَ ناشرکاری ءِ ھلاپ ءَ پاکستان ءِ کامیاتی ءُُ اے ساھت ءَ گران بھائیں بنی آدم آنی جانی تاوان ءُُ ماڑی آنی پرشت ءُُ پوش ءِ رنگ ءَ پاکستان ءِ کربانی آنی سرجمیں تران کت ءُُ گوشت کہ اے جنگ ءِ سبب ءَ پاکستان ءِ معشیت ھم آماچ بوتگ، پاکستان یک دراج بریں زمانگے ءَ چہ 30لکھ ءَ چہ گیش اوگان آنی میزبانی ءَ کنگ ءَ اِنت ایشی کساس ءُُ میزبانی ءِ وھد ءُُ پاس ءِ ھوالگ ءَ سرجمیں دگنیا ءَ مستر ءُُ گیشتر انت، میا ں اوستمانی برات پاکستان ءِ اے کربانی آناں بے من اَنت۔ مزن وزیر ءَ گوشت کہ پاک چین اقتصادی راہداری منصوبگ ءِ چیر دستی ءَ پاکستان 1700کلومیٹر دراج بُریں 6لین ءِ موٹرویز ءِ جوڑیشت ءِ لائک بوتگ، اے بازیں دیمروئی کنوکیں ملک آنی واستہ ٹوھیں کچ ءُُ کساس اِت۔ آئی ءَ گوشت کہ گوادر ءِ دِکہ انوں آپریشنل بوتگ آھودا میاں اوستمانی کد ءُُ بالاد ءِ شپمنٹس ءُُ لاجسٹک آسراتی رستگ اَنت۔
