پاکستان ءُ سعودی عرب یکے دومی ءِ نزیکیں دوست اَنت، ملکءِ صدر ممنون حسین
اسلام آباد۔ 22جنوری (اے پی پی) ملکءِ صدر ممنون حسین ءَ سعودی شاہی بحریہ ءِ کمانڈر وائس ایڈمرل فہد بن عبداللہ الغفیلی ءَ را نشان امتیاز (ملٹری ) داتگ۔ اے موھءِ سرءَ آئی ءَ گشتگ کہ پاکستانءُ سعودی عرب یکے دومیءِ نزیکیں دوست اَنت کہ آھانی سیادی ءِ جہلانکی لفزانی تہا بیان کنگ نہ بیت۔ داد دیئگءِ ھاسیں مراگش ءِ تہا پاک بحریہ ءِ سروک ایڈمرل ظفر محمود عباسی، سعودی سفیر نواف المالکیءُ دگہ مزنیں سولءُ فوجی حکام ءِ مزنیں کساسے ھوار بوتگ۔ مراگش ءَ پد صدر ءَ گوں سعودی بحریہ ءِ سروک ءَ گندءُ نند کتگ کہ آھانی درنیامءَ بازیں کارانی سرءَ ھیالءُ لیکہ ءِ درشانی کنگ بوتگ۔ صدرءَ سعودی بحریہ ءِ سروکءَ گوں گپءُ تران کنانءَ گشتگ کہ پاکستان ءُ سعودی عرب ءِ حکومت نہ بلکیں اُلسءِ درنیا مءَ جہلیں سیادی اَست کہ وتی جوانیں سُرءُ پرانی سوبءَ دوھیں ملک آنی معیشت ءِ تہا مھکمی ءِ تہا گیشی کنگءَ اَنت۔ صدرءَ گشتگ کہ دوھیں ملک آنی درنیامءَ اے جوانیں سنگتی آؤکیں وھداں گیش بیت۔ آئی ءَ گشتگ کہ پاک بحریہ ءُ سعودی شاہی بحریہ کجام ھم گرانیں ساھتءَ یکے دومی ءِ گوما اُوشاتگ۔ آئیءَ گشتگ کہ دوھیں براتیں ملک آنی بحریہ ءِ درنیامءَ کمک ءِ جاورھال ءِ سرءَ سدکی ءِ درشانی کتگءُ گشتگ کہ ایشیءِ باز جوانیں پاھدگ دیمءَ کا اَنت۔ ملکءِ صدرءَ سعودی شاہ سلمان بن عبدالعزیز السعود ءِ سروکی ءَ سعودی عرب ءَ جاری دیمروئی عملءِ سرءَ وشی ءِ درشانی کتگءُ گشتگ کہ آئیءِ سرپانکی ءَ جوڈ کتگیں دیمروئی ءِ منصوبہ اُلسءِ پلاحءُ گہبود ءِ وسیلگ جوڈ بنت۔ ملکءِ صدرءَ گشتگ کہ حضوراکرم ؐ ءَ دراھیں مسلمان آناں یکے دومی ءِ برات گشتگ ، آ دنیاءِ کجام ھم کنڈءَ نندوک بہ بنت وت مہ وتءَ برات مہ برات اَنت۔ آئیءَ گشتگ کہ مئے اے زمہ واری اِنت کہ مئے واجہ سردار دوجہان ؐ ءِ پنتءُ شونانی رندیگری ءَ بہ کن اَنت چیا کہ مسلمان آنی سوبمندی ءِ راز ھمیشی ءِ تہا اِنت۔
