بنی آدمی ازمت ءِ تہ ءَ دزگٹیں ٹیمب ءِ سرا اُرش بنی آدم ءِ سرا اُرش انت،بے ڈوھیں مردماں ءَ را نشانگ جوڈ کنوکیں ناشرکار بنی آدم ءِ دژمن ءُُ ترندیں سزا ءِ واھگدار انت،سر وزیر بلوچستان میر عبدالقدوس بزنجو

کو ئٹہ ۔18جنوری (اے پی پی)سر وزیر بلوچستان میر عبدالقدوس بزنجو ءَ کوئٹہ ءِ نزیکی دمگ شالکوٹ ءِ تہ ءَ پولیو ٹیمب ءِ سرا تیرکاری واکیہ ءَ را ترندیں لبزاں ایر جتگ ءُُ گوشت کہ انسانی ازمت ءَ دزگٹیں ٹیمب ءِ سرا بنی آدم ءِ سرا اُرش انت ،بے ڈوھیں مردماں را نشانگ جوڈ کنوکیں ناشرکار بنی آدم ءِ دژمن ءُُ ترندیں سزا ءِ ھقدار انت ۔سر وزیر بلوچستان ءَ آئی جی بلوچستان پولیس ءَ را پنت دات کہ پولیو ٹیمباں را ترندیں سیکیورٹی پھجارگ ءُُ وئیل ءَ ھوار ڈوہدار ءَ را دزگیر کنگ بہ بیت۔