اسلام آباد۔ 17 جنوری (اے پی پی)مزن وزیرشاہد خاقان عباسی ءَ ملک ءِ جتا جتائیں بھر آنی تہ ءَ گریب ءُُ بزگر آنی کمک ءِ بابت ءَ رورل سپورٹ پراگرام نیٹ ورک ءِ کوشست آناں ساڑات ءُُ گوشت کہ حکومت ناں ایوک ءَ گریب آنی ھمک رنگیں کمک پُجاری بلکینگ ءَ ایشاناں سرجمی ءَ وتی پاد آنی سرءَ اوشتگ ءِ واستہ کزب سکارینگ ءُُ کار کنگ ءِ تہ ءَ گیشی ءِ واستہ جزمیگ اِنت۔ آئی ءَ اے گپ رورل سپورٹ پروگرام نیٹ ورک ءِ ڈل ءَ گوں تران کنان ءَ گوشت اَنت ایشی ءَ وتی چیئرمین شعیب سلطان ءِ سروکی ءَ چار شمبے ءَ مزن وزیر کارگس ءَ آئی ءَ گوں گند ءُُ نند کت۔ ڈل ءَ بانک شندانہ خان، ڈاکٹر راشد باجوہ، مسعود الملک، محمد دیتال کلہوڑو، نادر گل ءُُ مظفر الدین ھوار اتنت۔ شعیب سلطان ءَ مزن وزیر ءَ را رورل سپورٹ پروگرام نیٹ ورک ءِ کار رپک ءُُ کرد ءِ بابت ءَ سرپد ھم کت ایش گریب ءُُ بزگر آناں سوشل موبلائزیشن نیٹ ورک ءِ وسیلگ ءَ کمک دنت۔ شعیب سلطان خان ءَ گوشت کہ رورل سپورٹ پروگرام نیٹ ورک یک شل ءَ وتی کار ءِ سر ءَ برجا اِنت ایشی ءِ تہ ءَ چاگردی نیٹ ورکنگ، کاررپک پیداک کنگ ءُُ بنی آدمی آسراتی آنی دیمروئی، کسانیں تک ءَ وام ءِ پُجاری ءُُ تکنیکی کمک ءِ گوما ضلوری رابطہ ءِ دیمروئی ھوار اَنت، اے رنگیں گامگیج آنی بدولت گریبی ءِ تہ ءَ کمی ءُُ گرییب آناں روزگار ءِ در جنگ ءِ لائک جوڑ کنگ ءِ واستہ جنوبی ایشیا ءِ جتا جتائیں ملک آنی تہ ءَ جوانیں آسر دزگیر بوتگ اَنت۔
