اسلام آباد۔ 17 جنوری (اے پی پی) مزن وزیر شاہد خاقان عباسی ءَ پاک۔سعودی یکجائی وزارتی کمیشن ءِ دیوان ءَ را وش کلوہ نامینان ءَ گوشت کہ ایشی ءَ چہ دو نیمگی اقتصادی یکوئی ءَ را زور ءُُ ھاٹیگ رسیت۔ آئی ءَ اے گپ سعودی عرب ءِ وزیر ءِ تجارت ءُُ سرمایہ کاری ڈاکٹر ماجد عبداللہ الکسابی ءَ گوں گپ ءُُ تران کنان ءَ گوشت آئی ءَ چار شمبے ءِ روچ ءَ مزن وزیر کارگس ءَ آئی ءَ گوں گند ءُُ نند کت۔ سعودی وزیر تجارت پاک۔سعودی یکجائی کمیشن ءِ یازدھمی دیوان ءَ بھر زوری ءِ واستہ 35 باسکی ڈل ءِ سروکی ءَ کنگ ءَ انت۔ پاک۔سعودی یکجائی وزارتی کمیشن ءِ دیوان ءِ ساھت ءَ کتگیں المی ایں پیسلہ آنی سرءَ ھیال ریچی کنگ بوت ایشی ءِ تہ ءَ پاکستان ءَ چہ سعودی عرب ءَ اِلاریں وردن ءِ برگ ءِ واستہ ورکنگ گروپپ ءِ برجائی، ساؤتھ نارتھ گیس پائپ لائن ءِ جوڑیشت ءَ سعودی سرمایہ کاری،دو نیمگی تجارتی منوگری ءِ سر ءَ گپ ءُُ تران ءَ را تُرند کنگ ءُُ پارلیمانی ڈل ءِ ھیال ریچی ھوار اَنت۔ سعودی عرب ءَ را پاکستانی مردم آنی برگ ءِ رد ءَ سعودی عرب ءَ پاکستان ءَ ٹریننگ انسٹی ٹیوٹ برجا کنگ ءِ سر ءَ تپاک کت تانکہ ایش بنی آدم آنی آسراتی پُجاری یے ضلورت پیلو کنگ ءَ کمک بہ رسیت۔
