اسلام آباد ۔ 17 جنوری (اے پی پی) مزن وزیر شاہد خاقان عباسی ءَ گوشت کہ قبائلی دمگ آنی جوڑیشت ءُُ دیمروئی حکومت ءِ اولی ترجی اِنت، استیں حکومت ءَ اولی رند ءَ فاٹا ءِ جیڈھ آنی گیواری ءَ دل یکیمی کوشست کتگ، فاٹا اصلاحات ءِ کار ءَ را دمگ ءِ الس ءِ لیکہ آنی رد ءَ آسر ءَ سر کناں۔ آئی ءَ اے گپ قبائلی دمگ آنی جتا جتائیں ایجنسیز آں گوں سیادی داروکیں مسلم لیگ (ن) ءِ صدر، نائب صدر ءُُ جنرل سیکریٹریز آنی ڈل ءَ گوں تران کنان ءَ آئی ءَ گوشت ایشاں چار شمبے ءِ روچ ءَ مزن وزیر کارگس ءَ آئی ءَ گوں گند ءُُ نند کت۔ ڈل ءِ سروکی وزیر ءِ مملکت برائے سیفران غالب خان کنگ ءَ اَت۔ گند ءُُ نند ءَ فاٹا اصلاحات، قبائلی دمگ آنی جوڑیشت ءُُ دمگ ءِ ھوالگ ءَ جیڈھ آنی سر ءَ ھیال ریچی کنگ بوت۔ ڈل ءَ گوں گپ ءُُ تران کنان ءَ مزن وزیر شاہد خاقان عباس ءَ گوشت کہ قبائلی دمگ آنی الس جوڑیشت ءُُ دیمروئی ءِ سر ءَ پکوئی ءَ کار بندات کتگ۔ آئی ءَ گوشت ملکی راجدپتر ءَ اولی رند ءَ استیں حکومت ءَ ناں ایوک ءَ فاٹا ءِ جیڈھ آںی گیوای ءِ واستہ پکوئیں کوشست کتگ بلکینگ ءَ ایشی ءِ سر ءَ پکوئیں ءَ کار بندات کتگ۔ آئی ءَ گو شت کہ فاٹا اصلاحات ءِ سر ءَ کار بندات بوتگ ءُُ اے کار ءَ را فاٹا ءِ الس آنی منشاھ ءَ آسر ءَ سر کنگ بیت۔ فاٹا انضمام ءِ سر ءَ گپ ءُُ تران کنان ءَ مزن وزیر ءَ گوشت کہ حکومت پھم ایت کہ فاٹا اصلاحات ءُُ ’’انضمام‘‘ ءِ کا ر بھر بھر ءَ سیم سر ءَ سر کنگ بیت تانکہ اے کار ءَ گوں بندوکیں کار ءُُ جیڈھ آنی گیواری کنگ بہ بیت۔ آئی ءَ گوشت کہ فاٹا ءِ الس آناں دیمروئی ءِ گام آں گوں ھمگام کنگ ءِ واستہ ضلوری اِنت کہ آھودے جوڑیشت ءُُ دیمروئی ءِ کار ءَ را دیمروئی دیگ بہ بیت۔ آئی ءَ گوشت کہ حکومت قبائلی دمگ آں ھم ملک ءِ ایندگہ بھر آنی وڑ ءَ وانگ ءُُ زانگ، جان سلامتی، روزگار ءِ موہ ءُُ ایندگہ آسراتی پُجاری ءِ واستہ جزمیگ اِنت۔ ڈل ءِ باسک آں فاٹا ءَ کار ءِ بندات کنگ ءُُ قبائلی دمگ آنی سر ءَ سیاھیں کانود ءَ را ھلاسی ءِ درگت ءَ گامگیج چست کنگ ءِ پد ءَ مزن وزیر ءِ شگر ءُُ منت گپت۔
