اسلام آباد۔ 13جنوری (اے پی پی) وزیر مملکت کیڈ ڈاکٹر طارق فضل چوہدری پارینے کہ ملک سیاسی آزموندہ کننگ کن جوڑ کننگ تنے، پی ٹی آئی تینٹ ہم السی خذمت ءِ کے و ننے ہم کننگ کن اِلے۔ مسلم لیگ (ن) نا حکومت نا اولیکو سال آن ہی دھرنہ و برانز کننگ نا سیاست نا بناءِ کننگا ہرانا نسخان الس ءِ مس، اپوزیشن نا رویہ ملک ءِ نزور کرے۔ نواز شریف قوم اتون کروک آ وعدہ غاتے پورو کرے و ملک آن تہاری تے چٹفے، نواز شریف انصاف نا بحالی کن عدلیہ ءِ بحال کرفے، ہراملک اٹی انصاف مرے اونا ہچ گہس پژہ سے ہم پالفنگ کپک، نواز شریف آ تنقید کروک آک ہمووخت آ تنقید کیر ہراتم داوڑنا شونداری کاریم ہم کیر، ننا ڈٹ آتے نشان تننگ پاننگا، داڈٹ آتا پوروی آن پد داالسی آسراتی نا غٹ آن بھلا ڈٹ پاننگار۔ داخیال آتا درشانی ءِ وزیر مملکت اسلام آباد ہائی وے آ سوہان انٹرچینج نا بناءِ کننگ نا وخت آ کرے۔ داڈٹ 74کروڑ روپئی نا خڑچ آن پورو کننگا۔ دانا سوب زیروپوائنٹ آن کورال چوک اسکان سگنل فری کوریڈور اس جوڑ مسنے۔ وزیر مملکت چِل کروڑ روپئی نا خڑچ آن زیروپوائنٹ آن کورال چوک اسکان سروس لین نا جوڑ جاڑ نا ہم پڑو ءِ کرے۔
