وزیراعظم نا اسلامیہ کالج پشاور کن پنچ کروڑ روپئی نا ہم پڑو
پشاور۔ 13جنوری (اے پی پی) وزیراعظم شاہد خاقان عباسی پارینے کہ ورناتا روزگار نا ویل آئی ٹی نا بشخ اٹی انقلاب آن ایسر مریک، انقلاب ہیت و داوا کننگ اٹ آخا بیرہ کاریم اٹ بریک، مستین اٹی ڈٹ آتا پڑو و بنداو ءِ تخنگاکہ وخت اس کہ ڈٹ آک پورو متورہ، ننا حکومت ہراڈٹ آتا بناءِ کرے اوفتے پورو کرے، ساڑی آ حکومت ہزار آ کلومیٹر موٹروے و 10ہزار میگاواٹ بجلی ودی کرے ولے نیشنل انکیوبیشن سنٹر نا جوڑ کننگ نا ڈٹ زیات اہم ءِ، ورناتے روزگار ملک تو انتہاپسندی چٹک۔ او ہفتہ نادے داڑے پشاور اٹی نیشنل انکیوبیشن سنٹر نا بناء نا وخت آ تران کریکہ۔ داوخت آ گورنر کے پی کے اقبال ظفر جھگڑا ، وزیر آئی ٹی انوشہ رحمان خان، وزیر مملکت اطلاعات و نشریات مریم اورنگزیب ، انجینئر امیر مقام و ایلوک ہم ساڑی ئسر۔ وزیراعظم پارے کہ پبلک پرائیویٹ شریداری ٹی جوڑ کروک آ ادارہ نا بناء داعلاقہ و آئی ٹی کن مزل نا نشان اس جوڑ مریک۔ دا انکیوبیشن سنٹر پائلٹ پروجیکٹ اسے۔ اوپارے کہ ہزار آ کلومیٹر موٹروے ، دہ ہزار میگاواٹ بجلی نا پیداوار ، ارب آ ڈالر آتا زرکاری ننا ڈٹ مسلم لیگ (ن) نا ساڑی آ دور اٹی پورو مسر یا برجاءُ ولے انکیوبیشن سینٹر نا جوڑ کننگ نا ڈٹ زیات اہم ءِ، داڑآن ورناتے آخبت نا راہشونی دوبریک۔ اوپارے کہ داہمو ادارہ ءِ ہرا ایلو ادارہ و ہندی و صوبائی حکومت آتے آئی ٹی نا انقلاب اٹی کڑد ادا کننگ نا بارواٹی راہشونی فراوان کننگ کیک۔ وزیراعظم پارے کہ مستین نا حکومت آک بیرہ پڑو و بنداو آتیا چکار تخاسر ولے دا اولیکو حکومت ءِ ہرا ہرا ڈٹ آتا بناءِ کرے اوفتا افتتاح ءِ ہم کرے۔ داوخت آ وزیر نا ساڑی گری ٹی چندی کمپنی تا نیام اٹ آئی ٹی نا بشخ اٹی کمکاری کن مفاہمت نا یات داشت آتیا دستخط ہم مس۔
