اسلام آباد۔ 13جنوری (اے پی پی) وزیراعظم شاہد خاقان عباسی قومی اسمبلی ٹی سپریم کورٹ و پشاور ہائی کورٹ نا دنگ ءِ فاٹا اسکان ودفنگ نا بل انا اواری اٹ منظوری آ مچ آ قوم ءِ مبارکبادی ترسا پارے کہ سپریم کورٹ و پشاور ہائی کورٹ نا دنگ ءِ فاٹا اسکان ودفنگ نا عمل قبائلی علاقہ غاتیٹی اصلاحات نا چرجوئی ٹی اولیکو گام ءِ۔وزیراعظم ہفتہ نا دے تینا اسہ کلہو اسے ٹی پارے کہ بل انا پاس مننگ فاٹا نا الس کن اسہ تاریخی ءُ گام اسے۔ شاہد خاقان عباسی فاٹا نا الس ءِ کانودی حق ملنگ آ مبارکبادی ترسا پارے کہ فاٹا نا الس کن اینو بھلو خوش خبری اسے نا دے ءِ۔ ہفتاد سال آن قبائلی الس ءِ ہرا حق ملتوکہ او دے مسلم لیگ ن نا حکومت اوفتے تسنے۔ بل انا منظوری آن فاٹا ٹی گدرینگوک آ کیہی دہائی آن رائج۔ ایف سی آر کانود نا چٹفنگ ممکن مننگ کیک۔ شاہد خاقان عباسی پارے کہ سپریم کورٹ و پشاور ہائی کورٹ نا دنگ انا فاٹا اسکان ودفنگ نا بل انا منظوری اہم ءُ گام اسے ہراڑآن قبائلی الس قومی دنگ اٹ اوار مریرہ و داڑآن پاکستان سوگو مریک۔
