اسلام آباد۔11جنوری (اے پی پی) ملک ءِ صدر ممنون حسین ءَ پالیسی آنی وسیلگءَ چہ راجی آمدنی ءُ دیمروئیءِ تہا گیشی کنگءِ ضلورتءِ سرءَ زور پِرداتگ ءُ گشتگ کہ پاکستان ءِ صنعتی ءُ بیپاری براتی ءَ ھوار دراھیں تبکاناں وتی وتی بھر ءِ کرد پیلو کنگ لوٹ ایت، گوستگیں لھتیں سالانی تہا راجی پیداوار ءِ تہا جوانیں گیشی بوتگ کہ ایشی ءَ چہ معیشت ءِ تہا گہتری اَتکگ۔ آئی ءَ اے گپ راولپنڈی چیمبرز آف کامرس اینڈ انڈسٹری ءِ ڈل ءَ گوں گپءُ تران کنانءَ کتگ کہ آھاں پنچ شمبے ءِ روچءَ چیمبر ءِ صدر زاہد لطیف خانءِ سروکی ءَ آئی ءِ گوما گندءُ نند کتگ۔ اے موھءَ ایوان صدرءُ وزارت بیپاری ءِ مزنیں حکام ھم ساڑی بوتگ اَنت۔ملکءِ صدرءَ گشتگ کہ حکومتءِ پالیسی راستیں نیمگے ءَ رھادگ اَنت بلے اے ھوالگءَ تاجر ءُ صنعتکار براتی ءَ را بیپاری وزارتءِ گوما نزیکی کنگ لوٹ ایت تنکہ پالیسی آنی تہا گیش گہتری آرگ بہ بیت۔ آئیءَ گشتگ کہ پاکستان ءِ بیپاری تبک راجی معیشت ءَ را مھکم داشت کنت، حکومت صنعت ءُ بیپاری ءِ گیشی ءِ ھاترءَ اے پڑءِ دراھیں جیڑھ ءُ جنجالانی گیشءُ گیواری کنگءَ سرجمءَ دلگوشی کنگءَ اِنت۔ آئیءَ گشتگ کہ اے حکمت عملی ءِ جوانیں نتیجگ دیمءَ پیداک اَنت۔
