سیالکوٹ۔ 8 جنوری (اے پی پی) مزن وزیر شاہد خاقان عباسی ءَ گوشت کہ سیاسی برجائی ءِ پالیشی ءِ رچ ءَ چہ ملک دیمروئی کت کنت، مسلم لیگ (ن) ءِ حکومت ءَ را اے شرپ رستگ آئی ءِ اے منصوبگ ھم سرجم کتگ اَنت ھما آھان کہ گوزتگیں حکومت ءَ کپ ءُُ چُنڈی ءَ یل کتگ بوتگ۔ مارا جنگ ءُُ چوپ کنگ ءِ ضلورت نہ اِنت، ھما کار کہ کتگ اَنت آ گندگ ءَ پیداک اَنت، ناشرکاری ءِ ھلاپ ءَ جنگ ءَ پاکستان ءَ ھما کامیاتی در جتگ ھما کہ دگہ اِچ کس ءَ در جنہ جتگ اَنت، سوداگر آنی سیلز ٹیکس ریفنڈ ءِ جیڈھ زوت گیوار کنگ بیت مارا 50ارب ڈالر ءَ چہ گیش برآمد ءِ نیمگ ءَ دلگوشی کنگ لوٹیت، ایمنی ءِ جاور ھال آنی تہءَ سک باز شرتری اتکگ، مزنیں کربانی دیان ءَ ما ناشرکاری ءِ بن روتگ ءَ را گوتکگ، توان ءُُ گیس ءِ جیڈھ ءَ را گیوار کنگ مئے واستہ ٹوھیں جیڈھ ءِ بوتگ، مرچی توان ءُُ گیس ءِ نیاد کم کنگ ءُُ ایشی ءِ رسگ ءَ را گہتر جوڑ کنگ ءِ کوشست جاڑی اِنت۔ حکومت ھمک ضلع ءَ یونیورسٹی جوڑ کنگ ءِ واستہ کار کنگ ءَ انت۔ آئیءَ اے ھیالانی درشانی دو شمبے ءَ ادا سیالکوٹ ایوان صنعت ءُُ تجارت ءِ مراگش ءَ گشتانک دیان ءَ کت۔ اے موہ ءِ سرءَ وزیر ءِ درئی کار خواجہ محمد آصف ھم ساڑی اَت۔ مزن وزیر ءَ گوشت کہ ما ملک ءَ را دیمروئی ءُُ وشھالی ءِ کشک ءَ رھادگ کتگ ءُُ ایشرا انشاء اللہ دیم ءَ جُنزیناں۔ آئی ءَ گوشت کہ مسلم لیگ (ن) حکومت محمد نواز شریف ءِ وڑن ءُُ پالیشی ءِ بدولت ءَ ملک ءَ را دیمروئی ءِ کشک ءَ دیم ءَ تیلانک داتگ۔ آئی ءَ گوشت کہ مرچی ملک ءِ اقتصادی جاور ھال 2013ءِ مٹ ءَ گہتر اَنت۔ آئی ءَ گوشت کہ اگاا8 ملک ءَ جاک، کوکار ءُُ بھتام بندی ءِ سیاست مہ بوت ایں گڈا اقتصادی جاور ھال ایشی ءَ سک باز گہتر بوتگ اَنت۔ آئی ءَ گوشت کہ مسلم لیگ (ن) ءَ گڈ گورننس ءَ را وتی کتگ ءُُ ھما کار ھم کتگ اَنت کہ گوستگیں حکومت آنی واستہ ناممکن گندگ بوتگ انت۔
