مزن وزیر ءَ را سیالکوٹ۔لاہور موٹر وے منصوبگ ءِ سر ءَ بریفنگ دیگ بوت
اسلام آباد ۔ 8 جنوری (اے پی پی) مزن وزیر شاہد خاقان عباسی یک روچی تر ءُُ تاب ءِ ھاترا سیالکوٹ ءَ سر بوت۔ سیالکوٹ ءَ سر بوھگ ءَ درئی کارانی وزیر خواجہ محمد آصف ءَ مزن وزیر ءَ را وش اتک کت وھدیکہ بُنجاھی وزیر توکی کار احسن اقبال ءُُ مشیر ’’ہوابازی‘‘ سردار مہتاب احمد ھم مزن وزیر ءِ ھمبراہ سیالکوٹ ءَ سر بوتگ۔ مزن وزیر شاہد خاقان عباسی ءَ سیالکوٹ ائیر پورٹ ءِ سر ءَ میاں اوستمانی ٹرمینل ءِ بنگیج کت۔ وتی سیالکوٹ ءِ تر ءُُ تاب ءِ ساھت ءَ مزن وزیر سیالکوٹ ءَ مسلم لیگ (ن) ءِ ورکز کنونسن ءَ گشتانک کنت ءُُ ایوان صنعت ءُُ تجارت سیالکوٹ ءِ باسک آں گوں گند ءُُ نند ھم کنت۔ نیشنل ہائی وے اتھارٹی ءِ کارندہ آنی نیمگ ءَ مزن وزیر شاہد خاقان عباسی ءِ سیالکوٹ۔لاہور موٹر وے منصوبگ ءِ سرءَ بریفنگ ھم دات۔اے موہ ءِ سر ءَ این ایچ اے ءِ کارندہ آنی نیمگ ءَ مزن وزیر ءَ را گوشگ بوت کہ سیالکوٹ ۔ لاہور موٹر وے ءِ سرجمیں دراجی 91.4کلومیٹر اِنت وھدیکہ منصوبگ ءِ سر ءَ ھرچ ءُُ درچ ءِ کساس 43 ارب 84کروڑ کلدر اِنت۔ آئی ءَ گوشت کہ سڑک ءَ را چار بھر آنی تہ ءَ جوڑیشت کنگ بوھگ ءَ اِنت ءُُ منصوبگ ءِ اولی بھر اپریل، دومی اگست وھدیکہ پشت کپتگیں دوئیں بھر گوزوکیں سالل دسمبر ءَ سرجم کنگ بنت۔ این ایچ اے ءِ کارندہ آں گیش ھال دات کہ سیالکوٹ۔ لاہور موٹر وے جوڑ بکن، چلائین ءُُ مٹ کن ءِ بنیات ءَ جوڑیشت کنگ بوھگ ءَ اِنت۔ سڑک آنی بنیاتی کوکا ءِ پراھ ءُُ شائیگانی ءِ بابت ءَ سرجمیں ملک ءَ گیش نوکیں سڑک ءُُ موٹر ویز ھم جوڑیشت کنگ بوھگ ءَ انت۔
