حکومت سروکی ءَ آیگ ءَ پد جھل کپوکیں صنعتی شوبگ ءَ را توان ءِ پُجاری ءَ را یکیمی جوڑ کت، مرچی پاکستان ءَ صنعتی شوبگ ءِ بندات بوتگ، احسن اقبال پاک چین اقتصادی راہداری ءَ چہ ما سرجمیں پڑ ءِ مردم آنی زندمان ءَ را مٹ کت کناں،
اسلام آباد ۔ 4 جنوری (اے پی پی) بُنجاھی وزیر برائے منصوبگ بندی دیمروئی کار احسن اقبال ءَ گوشت کہ گوستگیں سی سال آں چہ پاکستان ءِ صنعتی شوبگ جھل کپگ ءِ آماچ اِنت، حکومت سروکی ءَ آیگ ءَ پد صنعتی شوبگ ءَ را یک شل ءَ توان ءِ پُجاری ءَ را دل یکیمی کتگ، مرچی پاکستان ءَ صنعتی شوبگ ءِ بندات کنگ بوتگ۔ اسلام آباد ءَ سنٹر آف ایکسیلینس ءِ چیر دستی ءَ سی پیک ءِ سئے ماھی تاکبند ءُُ تنج ءِ بنداتی مراگش وزارت ءِ منصوبگ بندی ءُُ دیمروئی کار ءِ کارگس ءَ برجم دارگ بوت ایشی ءِ تہ ءَ پاکستان ءَ چین ءِ سفیر یاوجنگ ءُُ سیکرٹری منصوبگ بندی ءُُ دیمرؤی شعیب احمد صدیقی ءَ بھر زوری کت۔ مراگش ءَ گوں گشتانک دیان ءَ بُنجاھی وزیر احسن اقبال ءَ گوشت کہ سنٹر آف ایکسیلینس زانشت ءِ بنیات ءَ گامگیج چست کنگ ءَ اِنت۔ آئی ءَ گوشت کہ سئے ماھی تاکبند سنٹر آف ایکسیلینس ءِ ریسرچ ءِ شنگ ءُُ تالان بوھگ ءِ وسیلگ جوڑ بیت۔ ضلورت اے گپ ایگ اِنت کہ پاکستانی ءُُ چینی ریسرچ کنوک ءُُ تھنک ٹینک یکجائی ءَ اے پڑ ءِ دیمروئی ءُُ پالیشی جوڑ کنگ ءُُ سی پیک ءَ را کامیات کنگ ءِ واستہ کار بکن اَنت۔ وزیر ءِ توکی کار احسن اقبال ءَ گوشت کہ سی پیک ءَ چہ تُرسگ ءِ ضلورت نہ اِنت ایشی ءَ چہ ما اے سرجمیں پڑ ءِ مردم آنی زندمان ءَ را مٹ کت کناں۔ آئی ءَ گوشت کہ حکومت ءِ پاکستان ءَ وتی کمک وت کنگ ءِ چیر دستی ءَ کوئٹہ ءَ چہ گوادر ءَ تاں سڑک جوڑ کتگ ءُُ 40کلاک ءِ سفر ءَ را 8کلاک ءَ مٹ کتگ ایشی ءَ چہ مردم آنی زندمان ءِ تہ ءَ آسراتی پیداک بوتگ، چین فائبر آپٹیکل گلگت بلتستان ءَ چہ گوزیت، آھودا سافٹ وئیر پارکس جوڑ بنت، گلگت بلتستان ءِ اُلس نوکیں ٹیکنالوجی ءَ گوں نزیک بنت، اُلس ءِ کسمت جوڑ بیت۔ مراگش ءَ گشتانک دیان ءَ احسن اقبال ءَ گیش تران کت ءُُ گوشت کہ ادا یک انچیں ٹولہ ءِ کار کنگ ءَ اِنت کہ آ نہ لوٹ ایت کہ سی پیک ءِ سر ءَ کار بہ بیت ءُُ الس ءِ اندر ءَ گمراھ کنوکیں ھال شنگ کنگ بوھگ ءَ اِنت اے ٹولہ ءِ مول ءُُ مراد سی پیک ءَ را ناکام کنگ اِنت بلے اے مکسد کدئی کامیات نہ بیت چیاکہ نوں اُلس ءَ زانتگ کہ آوانی واستہ چے شر اِنت ءُُ چے ھراب۔ ھاٹیگ ءِ منصوبگ ءِ سرءَ تران کنان ءَ آئی ءَ گوشت کہ سی پیک ءَ بوھوکیں سرجمیں سرمایہ کاری 80درسد ھاٹیگ ءِ شوبگ آنی تہ ءَ انت ، سی پیک ءِ بدولت ءَ ھاٹیگ ءِ شوبگ ءَ پاکستان ءِ راجدپتر ءِ دُرستاں چہ مستریں 35ارب ڈالر ءِ سرمایہ کاری کنگ بوتگ، ھاٹیگ ءِ منصوبگ ءِ بدولت ءَ اُلس آناں توان رسیت وھدیکہ صنعت ءِ ٹائر یک رند ءِ پد ءَ چلئیت، سی پیک ءِ دومی بھر ءَ صنعتی شوبگ ءَ کمک ءَ چہ پاکستان زرّباری ایشیا ءَ صنعتی پیداوار ءِ بُن زییاھ جوڑ بیت ءُُ دیم ءَ کئیت۔ احسن اقبال ءَ گوشت کہ تھر ءِ اشکر ءِ نیام سعودی عرب ءُُ ایران ءِ ٹیل ءَ چہ گیش کول مائیننگ ءُُ تھر ءِ منصوبگءِ سرءَ چین سرمایہ کاری کنگ ءَ انت انوگ ءَ تاں تھر کول ءَ 5ارب ڈالر ءِ سرمایہ کاری ءَ را پکوئیں رنگ دیگ بوتگ۔ آئی ءَ گوشت کہ سی پیک ءِ جیڈھ راجی نپ ءِ واستہ اِنت پمشکہ ایشی ءِ سرءَ اچ چار ءُُ بچار کنگ نہ بیت اگاں سی پیک ءِ منصوبگ چین ءِ نپ ءَ بہ شُتیں گڈا پاکستان ایشی ءَ چہ دو سر نپ رس اِتگ اَت، وھد نوں اتکگ کہ ما جنگ ءُُ چوپ ءِ سیاست ءِ مٹ ءَ معاشی دیمروئی ءِ سیاست ءَ را وتیگ بکن آں ءُُ دیمروئی ءِ کشک ءَ نرم ءُُ آسودگ بکن آں۔
