اسلام آباد۔ 27اپریل (اے پی پی) صدر مملکت ممنون حسین پارینے کہ چین پاکستان اقتصادی راہداری ڈٹ آن ملک اٹی شون نا پوسکن ئُ دوراسینا بناءمریک م، قوم دا ڈٹ انا پوروی ٹی پورو کمک فراوان کے۔ او چارشنبے آ جناح کنونشن سینٹر اسلام آباد اٹی ورچوئل یونیورسٹی نا ہفت میکو کانووکیشن نا دود آن تران کریکہ۔ صدر مملکت پارے کہ اقتصادی راہداری آن پاکستان ڈیہہ نا بھلا واپاری بنجاجوڑ مریک۔ اوپارے کہ سی پیک نا تحت بجلی نا پیداوار و موٹرویز نا چندی ڈٹ آتے پورو کننگک و ملک انا غٹ بشخ آتے اقتصادی راہداری تون منسلک کننگک۔ دا ڈٹ انا اہمیت نا پیش نظر ڈیہہ نا ایلو ملک آک ہم اوڑآن فائدہ ہرفنگ کن داسی آن ڈٹ بندی نا بنائِ کرینو۔ صدر مملکت پارے کہ سی پیک ئِ عملی دروشم اس تننگ کن تکنیکی مہارت درکار مریک، ورناتے مرے کہ او انفارمیشن ٹیکنالوجی، بینکنگ و کامرس تون اوار تعلقدار بشخ آتے ٹی تعلیم وتربیت دوئی کیر تانکہ دا بھلا ڈٹ اتون وابستہ آخبت نا گرج آتے پورو کننگ مرے۔ صدر مملکت پارے کہ انفرادی و ادارہ جاتی کہول آ ڈیوالائی نا نتیجہ ٹی کبینی م، بے روزگاری ، لوڈشیڈنگ ، عسکریت پسندی کون آ چندی چیلنج آتا مون تروئی تما واہم اینو حالیت آک جتائُ ، ملک اٹی دہشت گردی ، انتہاپسندی و بدامنی نا چٹفنگ کن نیشنل ایکشن پلان نا بناءکننگانے ہراڑآعملدرآمد آن امن و معاشی سرجزآک بحال مسنو۔ اوپارے کہ ملک انا بھلا معاشی ٹک آتے ٹی مثبت تبدیلی اس بسنے ۔ اوورنا ، طالب علم آتیا زورشاغا کہ او ایمانداری و خلوص اتون کاریم کیر تانکہ ملک ئِ قائداعظم و علامہ اقبال نا وژن نا وڑوڈول جوڑ کننگ مرے۔ صدر مملکت پارے کہ بدعنوانی ننا راجی نظام ئِ بے وڑ زہمی کرینے ہنداخاطران ننے بدعنوان عنصر آتا پبی وڑاٹ حوصلہ شکنی ئِ کروئی مرے۔ صدر مملکت پارے کہ تعلیم نا بشخ اتون وابستہ بندغ آتے تینا پیشہ ئِ روزگار و کٹیا نا ذریعہ اس جوڑ کننگ آن بیدس ورنانسل آتا تعلیم و تربیت نا مقدس مشن سرپند کروئی مرے۔ او ای لرننگ و فاصلاتی نظام تعلیم نا ذریعہ ملک انا مر مر انگا علاقہ غاتے ٹی تعلیم نا مون آ دننگ کن ورچوئل یونیورسٹی نا خذمت آتا ستائِ کرے۔ داوخت آ صدر مملکت پیشن نا ملک رہینگوک پاکستانی تے بڑزکو تعلیم نا دوئی ٹی مون تروک مشکلات آتا حوالہ ئِ ترسا پارے کہ ورچوئل یونیورسٹی تینا فاصلاتی تعلیمی پروگرام آتا ذریعہ اوفتے تعلیم نا وارخواہی فراوان کننگ اٹی اہم کڑدادا کننگ کیک۔ صدر مملکت پارے کہ قوم انا آخبت نا انحصار ورنا نسل نا گچین تعلیم و تربیت آٹی ئِ ، ہنداسوب ئِ کہ او ورناتے تون بھاز اومیت آتے وابستہ کرینو۔ صدر مملکت سند ہلوک آ طالب علم آتے مبارکبادی تس وپارے کہ دا سرسہبی اوفتا لمہ و باوہ و استاد آتا کمک آن بیدس مننگ کتوکہ۔ ورناتے تینا بزرگ آتا ہمیشہ شرف ئِ کروئی مرے۔ صدر مملکت داوخت آ چناتا تعلیم آ خصوصی زورشاغسا پارے کہ او تینا تعلیم تون اوار اوار پاکستانی روایت و اخلاقی اقدار نا پاسداری ئِ ہم باوری جوڑ کیر۔ اوکان مست ورچوئل یونیورسٹی نا بہار 2014ءو خزاں 2015ءتعلیمی سیشن نا فارغ التحصیل مروک آ طالب علم آتے تمغہ و ڈگری تننگا۔ داوخت آ ورچوئل یونیورسٹی نا ریکٹرڈاکٹر نوید احمد اے ملک صدر مملکت ئِ یات گاری شیلڈ اس ہم پیش کرے۔ کانووکیشن نا دود اٹی یونیورسٹی نا بورڈ آف گورنرز نا چیئرمین رضوان بشیر خان و ہائر ایجوکیشن کمیشن نا چیئرمین ڈاکٹر مختار احمد ہم شرکت کرے۔
