اسلام آباد۔ 27اپریل (اے پی پی ) وزیراعظم محمد نواز شریف پارینے کہ حکومت لس بندغ نا زندانا آب ئِ گچین جوڑ کننگ کن شونداری ایجنڈہ آ سرگرمی اٹ عمل کننگ ئِ۔ او داہیت ئِ قومی اسمبلی نا باسک محسن شاہ نوازرانجھا، ندیم عباس ربیراو ملک ابرار احمد تون ہیت و گپ کرسا پارے ہراک چارشنبے آ ایوان وزیراعظم اٹی اوڑتون جتا جتا اوڑدہی کریر۔ وزیراعظم پارے کہ قومی اسمبلی نا باسک آتے الس تون تینا وعدہ غاتا پوروی ٹی ہرحد اسکان بایدے کار ہراک اوفتے گچین کرسا تینا پت انا درشانی ئِ کریر۔ وزیراعظم پارلیمان نا باسک آتے اوفتا حلقہ غاتے ٹی غٹ برجاءو بروک آ شونداری ڈٹ و شرحالی اسکیم تا پوروی ٹی تینا پورو مخ تفی نا یخین دہانی کرفے۔ داوخت آ پارلیمان نا باسک آک پاریر کہ ملک انا سلامتی نا حالیت و معیشت اٹی بھاز زیات گچینی بسنے و الس امن و شون نا بھرم آتیان مستفید مننگ ئِ ۔ اوملک ئِ شون نا کسر آ روان کننگ کن وزیراعظم نا سروکی نا ستائِ کریر ہرانا نتیجہ ٹی سیکورٹی نا حالیت گچین مس و مچ آ ملک اٹی بھلو کچ اسیا بنداوی ڈھانچہ نا شون نا ڈٹ آتیان خلقت آتے ٹی پوسکن ئُ اومیت اس ودی مس۔ پارلیمان نا باسک آک پاریر کہ او وزیراعظم نا سروکی ٹی الس نا شرحالی کن کاریم کننگ کن پرعزم ئُ۔
