اسلام آباد۔ 26اپریل (اے پی پی ) وزیراعظم محمد نواز شریف پارینے کہ ساڑی آ حکومت نا اسلوب حکمرانی نا وژن شفافیت و مستعدی آ مبنی ئِ و دا ہڑتوم آتیا ہچ ئُ سمجھوتہ اس مفک وخت اس کہ وزیراعظم بروک آ مسہ ہفتہ غاتا وخت ملک انا کیہی بشخ آتے ٹی پنچ موٹرویز نا بنداوئِ تخک۔ او داہیت ئِ سے شنبے آ این ایچ اے نا ڈٹ آتا بارواٹی دیوان نا کماشی ئِ کرسا پارے ہراٹی این ایچ اے نا چیئرمین شاہد اشرف تارڑ وزیراعظم ئِ مچ آ ملک اٹی برجاءو بروک آ شونداری ڈٹ آتا بارواٹی جامع حوال تس۔ وزیراعظم محمد نواز شریف بروک آ مسہ ہفتہ غاتا وخت حویلیاں۔ تھاکوٹ، ملتان ۔ سکھر ، ڈی آئی خان۔ ہکلہ ، لاہور۔ملتان و سیالکوٹ ۔لاہور موٹرویز آتا بنداوئِ تخک۔ وزیراعظم ئِ پاننگاکہ دا موٹروے ڈٹ آتا بناءئِ کرسا بے کچ شفافیت ئِ باوری جوڑ کننگانے ۔ چیئرمین دا ہم پارے کہ پا ک چین اقتصادی راہداری ڈٹ آتون اوار 800ارب روپئی نا مالیت نا بنداوی ڈھانچہ نا شون انا ڈٹ بروک آ اِرٹ آن مسہ سال انا وخت آ پورو مریرہ ۔ وزیراعظم پارے کہ ساڑی حکومت نا اسلوب حکمرانی نا وژن شفافیت و مستعدی آ مبنی ئِ و داہڑتوم آتیا ہچ ئُ سمجھوتہ اس مفک۔ وزیراعظم پارے کہ مچ آ ملک اٹی تالان کروک آ موٹر وے نا نیٹ ورک علاقائی رابطہ غاتے ٹی کمکار مریک۔ اوڑآن مچ آ ملک اٹی شونداری عمل زور ہلیک۔ پاکستان نا اقتصادی شون اٹی ودکی مریک و اونا نتیجہ ٹی مچ آ ملک اٹی روزگار نا وارخواہیک ودی مریرہ۔ اوپارے کہ دا غٹ کوشست آتا مسخت شونداری و اصلاحاتی ایجنڈہ ئِ عملی جامہ اس بیرفوئی ئِ ہرانا محور پاکستان نا الس نا شون و شونہالی ئِ۔ اوپارے کہ ننا کوشست آتیان الس نا زند انا معیار نمان وڑاٹ بڑز مسنے۔ اینو نا پاکستان مسہ سال مست انا پاکستان آن بھاز جوان و جتائِ۔ ننا مخلصانہ و سخت کوشست آتا نتیجہ ٹی بروک آ سال آتے ٹی زیات شون پسند و شون ہلوک پاکستان خننگ انگ کن ملک۔
