اسلام آباد ۔ 26اپریل (اے پی پی) وزیراعظم محمد نواز شریف پارینے کہ پاکستان آذربائیجان تون تینا شریداری و خڑکی دوستانہ تعلقداری تے بھاز زیات اہمیت ایتک و دفاع ، توانائی ، واپاری و اقتصادی بشخ آتے ٹی تین پہ تینی وڑاٹ مفید تعلقداری تے پین مون آ دننگ نا خواہندار ئِ۔ اوداہیت ئِ آذربائیجان نا وزیر دفاعی صنعت یاور جمالوف تون سے شنبے آ وزیراعظم ہاﺅس اٹی ہیت و گپ کرسا پارے۔ اوڑدہی ٹی بنجائی وزیر خزانہ اسحاق ڈار، وزیر دفاعی پیداوار رانا تنویر حسین و وزیرپٹرولیم وقدرتی وسیلہ شاہد خاقان عباسی ہم ساڑی ئسر۔ ہڑتوم آ کنڈآک واپار و معیشت نا بشخ آتے ٹی کمکاری ئِ پین ودفنگ و پوسکن آ وارخواہی تا پٹنگ کن اسیجائی وزارتی دیوان ئِ برجاءتخنگ آ اتفاق کریر۔ یاور جمالوف نا خیرمقدم ئِ کرسا وزیراعظم آذربائیجان نا صدر الہام علیوف تون مسکوہی خڑک اٹی ڈیووس اٹی مروک آ اوڑدہی نا ذکر ئِ کرے ہراٹی ہڑتوم آ راہشونک ہڑتوم آ ملک آتا نیام اٹ تعلقداری تے ٹی ودکی آ اتفاق کریسر ۔ یاور جمالوف جم و جوش اٹ خیر مقدمی آ وزیراعظم نا منت واری ئِ ادا کرسا آذربائیجان نا صدر نا کنڈآن نیک خوائش آتے سرکرے۔ اوپارے کہ آذربائیجان پاکستان تون دفاعی مصنوعات و خام مال انا درآمد کن پوسکن ئُ وارخواہی پٹنگ اٹی است خواہی تخک۔ او جے ایف 17تھنڈر نا خصوصی بابت آن بروک آ ستمبر اٹی آذربائیجان نا کنڈآن اڈ ترفوک آ بین الاقوامی دفاعی نمائش اٹی پاکستان ئِ شرکت نا سلہ ہم تس۔ اوحکومت پاکستان نا اقتصادی پالیسی تا ستائِ کرسا ہڑتوم آ کنڈآتا واپار اٹی ودکی نا گرج ئِ ہم تالان کرے۔ او آذربائیجان اٹی پاکستان نا کنڈآن زرکاری نا سلہ ہم تس۔ وزیراعظم پارے کہ پاکستان نمائش اٹی شرکت کیک و آذربائیجان نا صدر الہام علیوف کن نیک خوائش آتا درشانی ئِ کرے۔
