اسلام آباد۔ 26اپریل (اے پی پی) صدر مملکت ممنون حسین پارینے کہ پاکستان و آذربائیجان ئِ دفاع ، مواصلات و توانائی نا بشخ آتے ٹی تعلقداری تے وسعت تروئی مرے۔ اوداہیت ئِ آذربائیجان نا وزیر برائے دفاعی صنعت یاور جمالوف تون ہیت و گپ کرسا پارے ہراسے شنبے آ صدر مملکت تون ایوان صدر اٹی اوڑدہی کرے۔ صدر مملکت پارے کہ پاکستان و آذربائیجان نا نیام اٹ برادرانہ تعلقداریک اریر و پاکستان نگورونوکاراباخ نا ویل انا ایسری ئِ اقوام متحدہ نا قرارداد آتا وڑوڈول خواہک۔ اوپارے کہ ہڑتوم آ ملک آتا نیام اٹ واپاری حجم لائخی آن کم ئِ ہراٹی ہڑتوم آ کنڈآتا واپار اٹی وسعت آن ودفنگ مریک۔ صدر مملکت اومیت ظاہر کرے کہ پاک آذربائیجان اسیجائی وزارتی کمیشن نا شش میکو دیوان معاشی تعلقداری تے سوگو کننگ و ہڑتوم آ کنڈآتا واپار ئِ ودفنگ اٹی کمکار ثابت مریک۔ صدر ممنون حسین زور شاغا کہ سویلی ایشیاء، نیامی ایشیائ، سویل دیکی ایشیاءو چین نا نیام اٹ رابطہ غاتے مون آ دروئی مرے تانکہ ڈیہہ نا الس شونہال مننگ کے۔ صدر مملکت پارے کہ پاکستان دہشت گردی نا گواچی مسنے، دہشت گردی نا چٹفنگ کن آپریشن ضرب عضب سرسہبی اٹ جاری ئِ ۔ صدر مملکت ممنون حسین پارے کہ ہڑتوم آ کنڈآتا تعلقداری تے سوگوی کننگ کن السی کہول آ رابطہ غاتے ودفنگ و واپاری و دودوربیدہ درشان آتا گرج ئِ ۔ اوڑدہی ٹی بنجائی وزیر پٹرولیم شاہد خاقان عباسی و بنجائی وزیر دفاعی پیداوار رانا تنویر حسین ہم ساڑی ئسر۔
