جنیوا۔ 21اکتوبر (اے پی پی) پاکستان سویلی ایشیاءٹی سلہہ غاتا دوڑاٹی اوارے نہ اونا خواہندار ۔ داہیت ئِ جنیوا ٹی اقوام متحدہ کن پاکستان نا آخبتی مندوب تہمینہ جنجوعہ جنرل اسمبلی نا تخفیف سلہہ و بین الاقوامی سلامتی کمیٹی نا دیوان آن تران کرسا پارے۔ بظاہر بھارت نا حوالہ ئِ ترسا اوتنکی نا گواچی ڈیہہ تیٹی روایتی سلہہ غاتا توازن اٹی تبدیلی آ گڑتی نا درشانی ئِ کرے و پارے کہ دانا نتیجہ ٹی ڈیہہ نا سوگوی و علاقہ ٹی حساس علاقائی توازن کن خلیس زیات مریک، سویلی ایشیاءاسہ حساس ئُ علاقہ اسے و داڑے اسہ ریاست اسے نا کنڈآن فوجی خڑچ آک ڈیہہ نا ایلو فتا مقابلہ ٹی بھاز زیات ئُ۔ پاکستانی مندوب پارے کہ مخصوص وڑنا اسٹریٹجک ، سیاسی و واپاری مفادات آتے کن سویلی ایشیاءنا ڈیہہ کن دوہرے معیار نا چرجوئی ئِ ہلوئی مریک۔ اوپارے کہ پاکستان سویلی ایشیانا ڈیہہ ٹی اسٹریٹجک توازن کن پرعزم ئِ۔ پاکستان سویلی ایشیاٹی سلہہ غاتا دوڑ اٹی اوارے نہ اونا خواہندار۔ اوپارے کہ جوہری سلہہ غاتا تخفیف کن کوشست آتا نتیجہ ٹی روایتی سلہہ غاتا اجتماع ئِ نظر انداز کروئی مرے انتئے کہ تاریخ نا سبق دادے کہ سلہہ غاتیٹی عدم توازن نا سوب آن ہی ہڑتوم آ جہانی جنگ آک مسر۔ اوپارے کہ روایتی سلہہ غاتیا خڑچ آک 1.7کھرب ڈالر آن تجاوز کرینو وخت اس کہ اقوام متحدہ نا کل بجٹ داخڑچ آتا محض مسہ درسد ئِ۔ پاکستانی مندوب پارے کہ اگہ روایتی سلہہ غاتیٹی توازن ئِ برقرار تخنگ کن جامع پالیسی اس اختیار کننگ تو تو دا دروشم اٹ مثبت نتیجہ دوئی کننگ مفک۔ روایتی سلہہ غاتے کن سلہہ غاتا پیداوار اٹی کمتی و اونا مون ئِ توننگ، داکان بیدس اونا واپار و منتقلی ئِ محدود کننگ نا گرج ئِ اگہ داوڑ کننگ تو تو دنیانا کیہی ڈیہہ غاتیٹی تنکی تیٹی پین ودکی مریک و سوگوی نامزل ئِ دوئی کننگ ناممکن مریک۔ اوپارے کہ پاکستان روایتی سلہہ غاتا رداٹ کانودی، ریگولیٹری و ادارہ جاتی نوعیت نا گام گیج آتے باوری جوڑ کرینے۔ داکان بیدس روایتی سلہہ غاتیٹی توازن کن تعلقدار ضابطہ غاتے کن ودکی گام گیج کننگانے ہرافتے ٹی درآمدی و برآمدی لیسن اوارو۔ اوپارے کہ پاکستان پہہ مریک کہ آرمز ٹریڈ ٹریٹی روایتی سلہہ غاتا منتقلی نا رداٹ اسہ اہم ئُ گام اسے و اونابے پرخ نفاذ آن غٹ درکار نتیجہ غاتے دوئی کننگ مریک۔
