حکومت ملک اٹی الس ئِ جان جوڑی نا آسراتی تننگ کن پبی گام گیج کننگ ئِ، سرکاری و پرائیویٹ ہسپتال آتیٹی نیزگار آتے کبین آن کبین درمان ہم سرکاری خڑچ آ کرفنگک
رحیم یار خان۔ 21اکتوبر (اے پی پی) وزیراعظم محمد نواز شریف پارینے کہ حکومت ملک اٹی الس ئِ جان جوڑی نا آسراتی تننگ کن پبی گام گیج کننگ اٹی ئِ و داڑکن نیمہ بجٹئِ خڑچ کروئی تما تو کینہ، سرکاری و پرائیویٹ ہسپتال آتیٹی نیزگار آتا کبین آن کبین درمان ہم سرکاری خڑچ آ کرفنگک، نیزگارآتا شرحالی کن گام گیج آتیا اللہ ئِ جواب تروئی ئِ، مچ آ ملک اٹی پنجا پوسکنو ہسپتال جوڑ جاڑ کننگک، ملتان آن سکھر موٹروے آ کاریم جاری ئِ ، رحیم یار خان ئِ ہم داڑآن پبی فائدہ مریک، موٹرویز جوڑ مننگ آن فاصلہ کم مریک و فاصلہ کم مننگ آن نیزگار، جہالت و پسماندگی چٹک و خلقت آک اسہ ایلو نا خڑک بریرہ ، نن ادارہ غاتے گچین کرین، دہشت گردی نا برخلاف فیصلہ کن جنگ کرین، کراچی نا حالیت و معیشت ئِ سہی کرین، پٹرول و بجلی نا نرخ آتے کم کرین۔ اوداہیتئِ جمعہ آداڑے وزیراعظم نا قومی جان جوڑی پروگرام نا اجراءنا دود آن تران کرسا پارے۔ وزیراعظم حقدار تیٹی قومی جان جوڑی کارڈ بشخ وپانٹ کرسا پنجاب اٹی دا پروگرام نا بنائئِ کرے۔ وزیراعظم محمد نواز شریف پارے کہ کنے خوشی ئِ کہ قومی جان جوڑی پروگرام نا بناءرحیم یارخان اٹی ہم مننگ ئِ و دا پروگرام دے پہ دے مچ آ ملک اٹی تالان مننگ ئِ ، 31دسمبر 2015ءٹی دا پروگرام نا بناءکننگاسس، دانا بنائِ داسہ 10تو مسنے و کیہی ضلع غاتیٹی دا پروگرام نا بناءمسنے۔ رحیم یار خان اٹی ہم دا پروگرام نا رداٹ دونیم لکھ خاہوت رجسٹرڈ کننگ انگ ئِ۔ وزیراعظم پارے کہ دا پروگرام ہمو محروم و نیزگار خلقت آتے کن ئِ ہرا تینا، تینا لمہ و باوہ و تینا زائیفہ و چناتا درمان ئِ تینٹ کرفنگ نا طاقت تخپسہ و اوفتے درمان کن اکثر کڑز ہلوئی تمکو اوفتے داکڑز آتے تننگ نا ہم طاقت مفک ولے تینا لمہ و باوہ و چناتا درمان کرفنگ کن کڑز ہلنگ آ بیوس مریرہ چائے داڑکن اوفتے تینا اُرائِ سودا کروئی تمے، دا السی ویل انا ننے پبی ادراک ئِ ، تینا وزارت عظمیٰ نا مسکوہی دور اٹی ہم ای بِک آتا درمان کن مہم نا بنائِ کریسٹ و نیزگار آتا ڈائیلاسز ناپروگرام نا بنائِ کریسٹ ولے بدقسمتی آن گڈ اٹی دا ڈٹ حکومت آخ دا ڈٹ ئِ برجاتختوس۔ کاش ہندن مرے کہ دننگا پروگرامک حکومت آتا چٹنگ آن پد ہم برجاسلر۔ اوپارے کہ ارباب اقتدار و صاحب حیثیت خلقت آتے دننگا نیزگار خلقت آتا بارواٹی سجفوئی مرے ہرا درمان کننگ نا طاقت تخپسہ ، خاص کر اگہ کس اسے کینسر کون آ خراب انگا مرض لاحق مرے تو اونا کبین آ درمان کن اوفتے تون پیسہ مفک ، صاحب حیثیت خلقت آتے سجفوئی مرے کہ مخلوق خدا نا خذمت کن انت بست و بند و اہتمام کننگے۔ اوپارے کہ مسکوہی ٹی اربوں کھربوں روپئی دننگا ڈٹ آتیا خلنگا ہرافتا الس ئِ براہ راست فائدہ ہلوکہ، داڈٹ آتیٹی کک بیکس و کمیشنس کُننگاکہ، 100، 100 ارب نا ڈٹ کیہی کیہی سال چلنگرہ و اوفتیا بے تحاشہ پیسہ زیان کننگک، داوڑنا حکمرانک تینا آخبت ئِ خراب کیرہ۔ وزیراعظم پارے کہ ملک انا پیسہ غاک الس نا امانت ئُ و اوٹی خیانت کننگ بھاز بھلو گناہ اسے، ہراتم ای اپوزیشن اٹی اَسُٹ تو سوات اٹی نن کڈنی سینٹر اس جوڑ کرین ، دا ہسپتال کنا پن آ اڈتننگا ہراڑآ ای اوفتا منت وار اُٹ، ہسپتال نا افتتاح نا وخت آ کنے بھاز انگا چناک ، پیرانگا، زالبول و ورناک ملار ہرافتا مفت ڈائیلاسز مسکہ، کنے پاننگاکہ او دا آسراتی آن بھاز خوش ئُ۔ وزیراعظم داوکت آ دود اٹی ساڑی 32سال انا اسہ ورنااسے نا ذکر ئِ کرے ہرانا ہڑتوم آبِک آک فیل مسنو و اونا ڈائیلاسز مننگ ئِ۔ وزیراعظم پارے کہ انشاءاللہ اونا درمان مریک و اودے پوسکنو گردہ ہم خلنگک ۔ اوداورنا نا ذکر ئِ کرسا پارے کہ دادے ہفتہ ٹی اِرا وار درمان کن ہسپتال آ بروئی تماکہ و اونا خاہوت تون داخہ پیسہ ہلوکہ کہ او درمان کن دم دم آ بریر تو داوڑاو درمان ئِ امر کرفیرہ۔ اوپارے کہ دننگا بندغ آتا خیال کپننگ بھاز بھلو بیدادی اسے ہنداخاطران ننے داکنڈآتوجوہ تروئی مرے۔ اوپارے کہ کراچی نا حالیت آتے ہم نن سہی کرفین۔ پاکستان نا اسٹاک مارکیٹ اینو دنیا نا پنچ شون ہلوک اسٹاک مارکیٹس آتیٹی پن ہلنگک۔ پاکستا ن نا درملکی زرمبادلہ نا کوڑی اخس اینو ئِ داخس مہالو وختس ہم ہلو، کبینی کم مسنے، پٹرولیم مصنوعات آتا نرخ آتیٹی کمتی بسنے، اللہ تعالیٰ برکت عطاءکرینے انتئے کہ ہراتم نیت نیتی و است آتیٹی خلوص مرے تو اللہ برکت شاغک۔ وزیراعظم پارے کہ دا موٹروے 2019ءٹی پورو مریک وخت اس کہ 2018ءٹی ملک اٹی پوسکنا گچین کاریک مریرہ۔ 2018ءٹی ہی ہراتم ننا حکومت نا وخت پورومریک تو بجلی نا لوڈشیڈنگ ختم ہم مریک و ہڑزان ہم مریک۔ اوپارے کہ کنا ہنداخواہش ئِ کہ الس ئِ ہڑزان بجلی و گیس ملے۔ دا بابت پبی کوشست کننگ انگ ئِ ، کنا است اٹی قوم انا درد ئِ و ای قوم آ بھاریم ئِ کم کننگ خواوہ تانکہ الس عزت و سکھ اتون تینا زند ئِ تدیفنگ کیر۔
