اسلام آباد۔ 21اکتوبر (اے پی پی) صدر مملکت ممنون حسین 22آن 25اکتوبر اسکان قطر انا دورہ ئِ کیک، او امیر قطر و ایلو شخصیت آتون اوڑدہی کیک ہراٹی ہڑتوم آ کنڈآتیان تین پہ تینی تعلقداری تا اہم پلو آتا جاچ ئِ ہلنگک وخت اس کہ علاقائی معاملہ و بین الاقوامی پیش ہائے رفت آ ہم ہیت وگپ مریک۔ دفتر خارجہ نا کنڈآن جمعہ آ جاری بیان نا رداٹ پاکستان و قطر انا نیام اٹ غٹ بشخ آتیٹی شون و شان تعلقداریک استوار ئُ ، ہڑتوم آ ملک آک علاقائی و بین الاقوامی معاملہ غاتیا اسہ وڑنا موقف تخرہ و واقوام متحدہ و او آئی سی کون آ جہانی فورم آتیا اسہ ایلو نا مخ تفی ئِ کیرہ۔ ہڑتوم آ ملک آتا نیام اٹ تعلقداری تیٹی السی کہول آرابطہ غاتے خصوصی اہمیت دوئی ئِ۔ قطر اٹی اسہ لکھ 25ہزار آن زیات پاکستانی ساڑی ئُ ہرا قطر و پاکستان نا شون و شونہالی ٹی کڑد ادا کننگ ئِ۔ ہڑتوم آ ملک آتا نیام اٹ بڑزکو کہول نا تبادلہ غاک جاری ئُ۔ مارچ 2015ءٹی امیر قطر پاکستان نا دورہ ئِ کرے و اونا ورندی ٹی وزیراعظم فروری 2016ءٹی قطر نا دورہ ئِ کرے ہراڑآن برادر ملک آتا نیام اٹ ودوک آ تعلقداری تا عکاسی مریک۔ صدر مملکت ممنون حسین نا قطری سروک آتون باضابطہ مذاکرات و اوڑدہی تیٹی توانائی نا بشخ اٹی کمکاری، واپار، زرکاری ، دفاع و قطر انا مارکیٹ اٹی پاکستانی افرادی واک اکن روزگار نا وارخواہی تیٹی ودکی تون اوار کیہی بشخ آتیٹی ہڑتوم آ کنڈآتا تعلقداری تے پین مون آ دننگ آ توجوہ تخنگک ۔ صدر مملکت نا دورہ ہڑتوم آ کنڈآتا تعلقداری تے پین سوگوی تننگ اٹی کمکار ثابت مریک۔
