اسلام آباد۔ 17اکتوبر (اے پی پی) وزیر مملکت داخلہ و نارکوٹکس انجینئر بلیغ الرحمان پارینے کہ مسلم لیگ (ن) نا حکومت نا سرسہب خارجہ پالیسی نا سوب پاکستان نا روس، نیامی ایشیائی ریاست و دنیا نا کیہی ملک آتون گچین تعلقداریک استوار مننگ ئُ۔ ریڈیو پاکستان نا پروگرام نقطہ نظر اٹی ہیت وگپ کرسا اوپارے کہ پاکستان مسلم لیگ (ن) نا سرسہب خارجہ پالیسی نا سوب آن دنیا پاکستان ئِ خراج تحسین پیش کننگ ئِ و بھارت مقبوضہ کشمیر اٹی کروک آ بیدادی نا سوب دنیا ٹی صفائی پیش کننگ نا باوجود تنیا نظر بننگ ئِ۔ اوپارے کہ دنیا کشمیر نا ویل آ پاکستان نا موقف نا مخ تفی ئِ کننگ ئِ و ہندا سوب ئِ کہ مقبوضہ کشمیر اٹی پاکستان تون اوار اوار چین نا بیرک ئِ ہم چست کننگ انگ ئِ۔ انجینئر بلیغ الرحمان پارے کہ وزیراعظم محمد نواز شریف نا پارت آ پاکستانی دفترخارجہ و سفیر کشمیر نا ویل ئِ مچ آ دنیاٹی گچین وڑاٹ تالان کننگ ئُ ہرانا اقوام متحدہ ٹی پاکستانی مندوب ملیحہ لودھی ہر وخت کشمیر نا ویل انا بابت تینا فرض ئِ گچین وڑاٹ پیش کننگ اٹی ئِ و اقوام متحدہ تون اوار جہانی واک آتے مقبوضہ کشمیر اٹی کروک آ بھارتی بیدادی نا سرجم احوال آتیان معلومدار کننگ ئِ۔ اوپارے کہ ہنداسوب ئِ کہ داسا مقبوضہ کشمیر اٹی تحریک آجوئی اسہ پوسکنو موڑاسے آ نظر بننگ ئِ۔ پاک چین تعلقداری نا بابت چست کروک آ سوج انا ورندی ئِ ترسا اوپارے کہ ساڑی آ حکومت نا سرسہب پالیسی تا سوب ہڑتوم آملک آتا تعلقداریک مسکوہی نا نسبت بھاز جوان مننگ ئُ و چین توانائی، روڈ آتا جوڑ جاڑ و اقتصادی راہداری ڈٹ آ بھلو زرکاری اس کننگ ئِ ہرانا دنیا ٹی ہچ ئُ مثال اس ملیپک۔ پاک روس انا تعلقداری تا بابت سوج انا ورندی ئِ ترسا اوپارے کہ ہڑتوم آ ملک آتا تعلقداریک بھلو وخت اسے آن کشیدہ ئسرہ واہم ساڑی آحکومت نا دور اٹی ہڑتوم آ کنڈآتا تعلقداری ٹی گچینی بسنے و ہڑتوم آ ملک آک مشترکہ فوجی مشق ہم کرینو و روس کشمیر نا ویل آ پاکستان نا موقف نا ہم ستائِ کننگ ئِ وخت اس کہ روس و بھارت و آذربائیجان تون اوار کیہی ملک آتون تعلقداری تیٹی ودیکی بسنے۔
