اسلام آباد۔ 22ستمبر (اے پی پی) قومی اسمبلی نا سٹیڈنگ کمیٹی کشمیر نا باسک میجر (ر) طاہراقبال پارینے کہ بھارت مقبوضہ کشمیر نا ویل انا ایسری کن تینا کسرشون جواہر لال نہرو نا پیش کروک قرارداد ئِ مننگ کن ہم تیار افک۔ ریڈیو پاکستان تون ہیت وگپ کرسا اوپارے کہ 70سال تدینگانے و کشمیر نا ویل ہندن آن ہندن ئِ و بھارت مقبوضہ وادی ٹی پدریسہ انسانی حق انا پامالی ئِ کننگ ئِ۔ اوپارے کہ بھارتی بیدادی آن تنگ برسا کشمیری ورناک اسہ وار ولدا جوش و جوزہ اٹ پٹ اٹ بسونو و ورنا تا پاننگ ئِ کہ او داسا اوبھارتی بیدادی نا بدلہ و حق خودارادیت نا رداٹ آجوئی دوئی کننگ آن بیدس آرم اٹ تولپنہ۔ میجر (ر) طاہر اقبال پارینے کہ بھارت مقبوضہ کشمیر اٹی تدینگوک آ مسہ توآن کرفیو خلکونے و خلقت آتا اُراغان پیش تمنگ آ پورو پابندی ئِ ۔ اوپارے کہ روان جاری تحریک نا وخت بھارتی فوج سد آن زیات ورناتے شہید و ہزار آتے ٹھپی کرینے، ظلم انا انتہاءدادے کہ ٹھپی تے ہسپتال آ دروک آ ایمبولینس آتیا جلہو، ڈاکٹر و پیرامیڈیکل سٹاف ئِ ہراساں کننگ ئِ۔ اسہ سوج اسے ناورندی ٹی اوپارے کہ وزیراعظم محمد نواز شریف نا کنڈآن ہیومن رائٹ کمیشن ئِ چھٹی، جنرل اسمبلی ٹی تران و جہانی کسرشون آتون اوڑدہی تیان کشمیر نا ویل گچین وڑاٹ تالان مسنے۔ اوپارے کہ داسا وخت بسنے کہ کشمیر نا ویل زوت آن زوت ایسر مریک گڑاسلک۔
