اسلام آباد۔ 22ستمبر (اے پی پی) چیف کمشنر اوغان مہاجرین ڈاکٹر عمران زیب پارینے کہ اینخو سال 4لکھ اوغان مہاجر آتا وطن آ پدی ہِننگ نا اومیت ارے داوخت اسکان 2لکھ غیر رجسٹرڈ اوغان مہاجر وخت اس کہ اسہ لکھ 20ہزار آن زیات رجسٹرڈ مہاجر وطن آ تینا پدی ہنانو۔ داخیال آتا درشانی ئِ او پارلیمانی جماعت آتے اوغان مہاجر آتا وطن آ پدی ہِننگ آ ودی مروک آ حالیت آتیا بریفنگ ترسا کرے۔ اوپارے کہ حکومت پاکستان اسہ ہم رجسٹرڈ اوغان مہاجر اسے جبری وڑاٹ ملک آن بے دخل کتنے دابابت بیان آک راست افس ملک اٹی داوخت آ 14لکھ رجسٹرڈ اوغان مہاجر آتیان اسہ لکھ 20 ہزار رجسٹرڈ اوغان مہاجر تینا وطن آ پدی ہنانووخت اس کہ غیر رجسٹرڈ 2لکھ اوغان مہاجر وطن آ پدی ہنانو۔ اوپارے کہ پاکستان مسکوہی چل سال آن اوغان مہاجر آتا سریس میزبان کروک آ اسٹ انگا ملک ئِ ولے پاکستان نا حکومت اوغانستان نا حکومت تون اوغان مہاجر آتا پدی ہِننگ نا بابت اوغانستان نا صدر اشرف غنی تون اوڑدہی کرسا معلومدار کرے تو اوغان صدر پارے کہ مہاجر آک کنا قوم آن ئُ اوفتے ضرور وطن آ پدی اتیوہ ۔ ڈاکٹر عمران زیب پارے کہ دابابت اوغانستان نا صدر نا کوشست آک ستاکڑزرہ۔ اواوغان مہاجر آتا وطن آ پدی ہِننگ نا بابت سنجیدہ ئِ۔ رجسٹرڈ اوغان مہاجر آتا غٹ آن زیات کچ صوبہ خیبر پختونخوا ٹی رہینگ انگ ئِ ہرافتا کچ 9لکھ آن زیات ئِ ۔ اوپارے کہ حکومت پاکستان ہم رجسٹرڈ اوغان مہاجر آتے جبری وڑاٹ ملک آن بے دخل کپننگ ئِ دابابت آن تاثر درست اف و نہ ہی دارجسٹرڈ مہاجرآک ڈوہ اٹی اوڑدہ ئُ۔
