مظفرآباد۔22مئی (اے پی پی): مزن وزیر محمد شہباز شریف ءَ گشتگ کہ بھارت 1971 ءِ شکست ءِ بدلہ ءَ بہ زوریت، مودی سرکار نوں پاکستان ءِ سرا اُرش کنگ ءَ پیسر سد رند ءَ جیڑ ایت۔ پاکستان ءَ روایتی جنگانی تہا وتی برتری ثابت کتگ۔ ان شاء اللہ داں 7می کرن ءَ ایٹمی سلاہ ءِ زلورت نہ بیت۔ اے نوکیں راجدپتر ءِ کسانیں جنگ بوتگ۔ آؤکیں وھد ءَ ھم دژمن پاکستان ءَ گوں جوانیں چمے ءَ چارگ ءِ ھمت ءَ نہ کنت۔ پاکستانی فوج ءُ مہلوک ءِ شہیداں نوکیں راجدپتر گوں وتی ہوناں جوڑ کتگ۔ وھد اتکگ کہ راج یکوئی ءُ تپاکی ءِ وسیلگ ءَ معاشی طاقت جوڑ بوھگ ءِ سفر ءَ بندات بہ کنت۔ اے ھیالانی درشانی آئی ءَ پنچ شمبے ءِ روچ ءَ انصاف ءِ جہد ءِ ساھت ءَ آزات کشمیر ءَ شھید بوتگیں شہری آنی وارث آنی نیام ءَ کمکی فنڈز بھر ءُ بانگ ءِ مراگش ءَ گوں تران کنان ءَ کت۔ مزن وزیر شہباز شریف ءَ شہیدانی وارث آنی نیام ءَ کمکی زرّ بھر ءُ بانگ کتگ۔ اے موہ ءِ سر ءَ وفاقی وزیر ءُ آزات کشمیر ءِ مزن وزیر ءَ ھوار شھید آنی وارث آنی مزنیں کساس ءَ ساڑی ات۔ مزن وزیر شہباز شریف ءَ گوشت کہ لھتیں روچ پیسر پاکستان ءُ ھندوستان ءِ نیام ءَ جنگ ءِ بندات بوت کہ ایشی ءَ را ھترناکیں رنگے زورگ بوت کنت۔ جنگ ءِ آسر ھراب بوت کنت۔ آئی ءَ گوشت کہ پہلگام ءِ وئیل یک سانحہ یے، ایشی ءِ آڑ ءَ بھارت ءَ پاکستان ءِ سر ءَ بے بنیں الزام جتگ۔ پاکستان ءَ دنیا ءَ را اے گپ ءِ سر ءَ دلجم کت کہ ھندوستان ءِ اے گپ بے بن اَنت، دروگ ءِ سر ءَ بندوک اَنت ءُ یک انچیں سازش ءِ بھر اَنت کہ دمگ ءِ امن ءَ ھلاس ءُ ھراب کنت۔ مزن وزیر ءَ گوشت کہ کاکول ءَ وتی گشتانک ءِ ساھت ءَ آئی ءَ جار جتگ کہ پہلگام ءِ واکیہ ءِ بے رھبندیں میاں اوستمانی پٹ ءُ پول ءِ واستہ پاکستان تیار اِنت، بلے ھندوستان ءَ اے گپ ھضم نہ کتگ ءُ مئے لوٹ یلہ داتگ ءُ پاکستان ءِ سر ءَ اُرش کتگ۔ بھارتی زوراکی ءِ آسر ءَ بہاول پور، آزاد کشمیر ءُ ملک ءِ دگہ دمگاں 33 شھید ءُ 55 ٹپیگ بوتگ اَنت۔ ہندوستان ءَ بے سلاہیں پاکستانیانی سرا اُرش کتگ۔ پاکستان ءِ سلاہ بندیں اُرد ءَ ہندوستان ءِ زوراکی ءِ سرا جوانیں رنگے ءَ پسو دات۔ مئے سلاہ بندیں اُرداں شہری آبادی ءَ نشانگ جوڑ کنگ ءِ بدل ءَ 6 ھندی بالی گراب ءِ سرا تیر گواری کتگ کہ آیاں سک باز ناز بوتگ ءُ ھندوستان ءَ گوں الفتح پریڈاں وتی چھٹی ءِ شیر ءِ یات داتگ بلے ھندوستان ءَ وتی بار باریں الزام ءُ اُرش برجاہ داشتگ اَنت۔ مزن وزیر ءَ گوشت کہ دگنیا ءِ بے کساسیں ملک سرجمی ءَ یکوئی ءَ اَنت کہ پاکستان راست اِنت ءُ آئی ءَ یک میاں اوستمانی پٹ ءُ پولی کمیشن ءِ جوڑ کنگ ءِ اے گپ ءِ ثبوت اِنت کہ آئی ءِ دست ساپ اَنت۔ ہندوستان ءَ اے گپ ءِ سرا فخر ات کہ سرجمیں دنیا ءِ طاقت آئی ءِ ہمراہی ءَ اوشتات کن انت بلے ہندوستان ءِ دوستیں ملک نیوٹرل بوت انت ءُ ہما کہ غیر جانبدار اتنت آہاں پاکستان ءِ سرجمیں حمایت کت ءُ مئے موقف ءِ جواز پیش کت۔ مزن وزیر ءَ گوشت کہ پاکستان ءَ ھما 6 بالی گراب ایر کتگ ءُ بھارتی تنصیبات آناں تاوان داتگ اے دفاع ءِ واستہ یک ٹکر ءِ انت۔ مئی ءِ شپ ءَ ما ناپٹلا ءِ سرا اُرش کنگ ءِ فیصلہ کت ءُ 10 مئی ءِ سہب ءَ من گوں بیران بوتگیں جنرل ءَ گپ ءُ تران کت۔ آئی ءَ من ءَ گوشت کہ ہندوستان ءَ نورخان ائیر بیس ءُ اے دگہ جاگہاں گوں میزائلاں اُرش کتگ۔ جنرل ءِ توار ءَ چہ دلجمی ، شوق ءُ ھیجان ءَ پُر ات۔ آئی ءَ من ءَ گوشت کہ ہندوستان ءِ دیم ءَ انچیں تھپڑے جنگ بہ بیت کہ آئی ءَ داں گڈسر ءَ یات بہ بیت۔ نتیجہ ءَ پٹھان کوٹ ءَ بگر داں کرم ءَ آہانی ہچ ائیر بیس مئے شاہنواز میزائل ءِ دست ءُ رنج ءَ چہ در نہ بوتگ۔ سھب ءِ 9 ءَ جنرل ءَ پدا فون کت ءُ گْوشت کہ من آھاں ھال دیاں کہ ھندوستان سرنڈر کنگ ءَ تیار اِنت۔ مزن وزیر ءَ گوشت کہ مودی سرکار آیوکیں وھد ءَ پاکستان ءِ سر ءَ اُرش کنگ ءَ پیسر سد رند ءَ جیڑ ایت۔ پاکستان ءَ روایتی جنگ ءَ ہندوستان ءِ برتری ءِ تاثر رد ثابت کت ءُ 1971 ءِ شکست ءِ بدلہ زرت۔خدا ءِ شکر انت کہ مارا بازیں وھدے ءَ چہ ایٹمی سلاہانی زلورت نہ بوتگ ءُ انشاءاللہ مارا ایشانی زلورت نہ بیت۔ مزن وزیر ئَ گوشت کہ 240ملین مردم آنی دعا ئِ پد ئَ انصاف ئِ جنگ ئَ مزنیں سوبمندی ئِ پاس بوت۔ انصاف ءِ جنگ ءَ سرجمیں راج پاکستانی فوج ءِ پُشت ءَ اوشتاتگ۔ ملک ءِ حاکمیت ءُ ایمنی ءِ رکھینگ ءِ واستہ نیرو سلاھ بندی سرجمی ءَ تیار انت ۔ مزن وزیر ءَ گوشت کہ تپاکی ءُ تپاکی ءِ وسیلگ ءَ نوں ملک ءَ را اقتصادی طاقت جوڑ کنگی انت۔ اے راجدپتر ءِ کسانیں جنگ ات کہ ایشی ءِ تہا عمومی ءُ اللہ تعالیٰ ءِ سرا بے دروریں توکل ءِ بہادر ءُ زانتکاریں سروکی ءَ سوبمندی زرتگ ات۔ مزن وزیر ءَ گوشت کہ ما شپ ءُ روچ محنت کنگ ءَ پاکستان ءَ را معاشی رد ءَ مستحکم جوڑ کنگ ءَ ایں، ءُ ما یکوئی ءُ تپاکی ءَ گوں دیم ءَ جنزاں تانکہ دژمن ءَ مارا نیوٹرل چم ءَ چارگ ءِ ہمت مہ بیت۔ مزن وزیر ءَ گوشت کہ شپ ءُ روچ کار کنگ ءَ چہ وام آنی تہ ءَ ھم رکّگ بنت۔ مزن وزیر ءَ گوشت کہ پاکستان کشمیری آناں روحانی، سفارتی ءُ اخلاقی کمک ءَ برجاہ دار ایت، آ انگت ءَ وتی ھک ءِ واستہ سنگ ءِ رنگ ءَ اوشتاتگ انت ءُ اقوام متحدہ ءِ سلامتی کونسل ءِ قرارداد آنی رد ءَ کشمیری آں تاں وت واجئی ءِ ھک ءَ گوں اوشتات کنت۔ مزن وزیر ءَ گوشت کہ مرچی مظفر آباد ءَ چہ من سری نگر ءِ الس ءَ اے کلوہ ءَ سر کنگ لوٹ آں کہ آ کدی ھم پاکستان ءِ نیمگ ءَ پشت نہ کن اَنت ءُ آ روچ کئیت کہ کشمیری آناں وتی ھک رس ایت ءُ کشمیر پاکستان جوڑ بیت۔ مزن وزیر ءَ ریلیف پیکج ءِ ھوالگ ءَ گوشت کہ شھید بوتگیں شہری آنی وارث آناں 10 لک کلدار ءُ ٹپیگ آناں یک لک ءَ چہ 2 لک کلدار دیگ بوتگ، ایشی ءِ تہ ءَ باقی ءِ زرّ زوت پشت کپتگیں آماچیں مردم آناں دیگ بیت۔ پاک سلاہ بندیں اُرد ءِ شہیدانی وارث آنہانی عہد ءِ حساب ءَ دہ لک ءَ چہ 18 لک کلدار زرّ دیگ بنت۔ شہیدانی وارث آناں عہد ءِ رد ءَ 19ملین ءَ چہ 42ملین کلدار ءَ گس ءِ آسراتی پجاری کنگ بیت۔ شہیدانی سرجمیں پگار چہ الاؤنساں ھوار تاں آھانی ریٹائرمنٹ ءَ برجاہ بیت ءُ شھید ءِ زھگاں تاں گریجویشن ءَ مفت وانگ ءُ زانگ ءِ آسراتی دیگ بیت۔ شہیدانی جنک آنی آروس کنگ ءِ واستہ یک لکھ کلدار ءِ میریج گرانٹ پجاری کنگ بیت۔ پاکستانی سلاھبند ءِ ٹپیگاں 2 لک ءَ بگر داں 5 لک کلدار دیگ بیت۔ آئی ءَ گوشت کہ ھمک سرکار ءِ پرز انت کہ آ مزنیں شھید آنی وارث ءُ غازی آنی ھزمت ءَ بہ کنت کہ آھاں ملک ءِ واستہ وتی سر ندر کتگ انت۔ مراگش ءَ گوں گشتانک دیان ءَ آزات کشمیر ءِ مزن وزیر چوہدری انورالحاق ءَ گوشت کہ بھارت یک چالاکیں دژمنے، بلے پدا اُرش کنگ ءِ جرات نہ کنت۔ آئی ءَ گوشت کہ پہلگام فالز پرچم آپریشن ءِ آڑ ءَ ایشی ءَ مقبوضہ کشمیر ءَ مسلمان آنی سر ءَ زوراکی گیش کتگ، کشمیری آنی لوگ ھلاس کنگ بوھگ ءَ انت، ھزاراں کشمیری بیگواہ کنگ بوھگ ءَ انت، مقبوضہ وادی ءَ انسانی ھک آنی لگتمالی برجاہ انت۔ خضدار واکیہ ءِ پشت ءَ بزدلیں دژمن ہندوستان انت۔ کشمیر امور ءِ وفاقی وزیر اجندینئر امروس مقام ءَ مراگش ءَ گوں تران کنان ءَ گوشت کہ سرجمیں راج ءَ یکجاھی کتگ ءُ چالاکی ءِ دژمن ءِ زوراکی ءِ ھلاپ ءَ زوراکی ءَ گوں دیم پہ دیم بوتگ۔ پاکستان ءِ سلاہ بندیں اُرد ءَ اے زوراکی ءِ سرا جوانیں رنگے ءَ پسو داتگ ءُ پاکستان ءِ بالی اُرد ءَ ھندی بالی گراب ایر کتگ ءُ دژمن ءِ شان ءُ شانت ءِ سرا زھر شانی کتگ۔ شہیدانی ھاندان ءَ را یات کنان ءَ آئی ءَ گوشت کہ ھندی زوراکی ءِ ھلاپ ءَ الس ءِ جزبگ بے درور ءُ قابلِ ذکر اِنت۔ لائن آف کنٹرول ءِ کش ءُ گور ءَ نندوکیں مردمانی روح ہم ستا کرزیت۔ آئی ءَ گوشت کہ بھارت کشمیری آنی روح ءَ را شکست دات نہ کنت۔ آزات کشمیر ءِ مردم چو سیمنٹ ءِ دیوال ءَ سلاہ بندیں اُرد ءِ کش ءَ اوشتاتگ اَنت۔ آئی ءَ گوشت کہ بھارتی زوراکی ءَ چہ لوگ آناں بوتگیں تاوان ءِ ھلاسی کنگ بیت۔
