اسلام آباد۔ 22ستمبر (اے پی پی) مسکوہی سفیر عارف کمال پارینے کہ جہانی برادری کشمیر نا ویل انا ایسری کن تینا کڑد ئِ ضرور ادا کیک۔ ریڈیو پاکستان تون ہیت وگپ کرسا اوپارے کہ بھارت مقبوضہ کشمیر اٹی کروک آ بیدادی و انسانی حق انا پامالی تیان دنیا نا توجوہ ئِ اسہ پلو کننگ و کشمیر نا ویل ئِ توننگ کن اوڑی کون آ ہتھکنڈہ غاتے کاریم اٹ اتنگ ئِ۔ اوپارے کہ داسا کشمیری تا توار ئِ چپ کرفنگ ممکن اف۔ مسکوہی سفیر پارے کہ وزیراعظم محمدنواز شریف نا کنڈآن اقوام متحدہ نا جنرل اسمبلی نا وخت آ تران و جہانی کسرشون آتون اوڑدہی تیٹی کشمیر نا ویل ئِ تالان کننگ اسہ گچین و بروخت گام اسے۔ اوپارے کہ وزیراعظم جہانی کسرشون آتون اوڑدہی تیٹی کشمیر اٹی بھارتی بیدادی نا سہی عکس ئِ پیش کرینے کہ بھارت کودک کشمیری تے ہراوڑ شہید، کورو ٹھپی کننگ ئِ۔ اوپارے کہ مقبوضہ کشمیر مسہ جوہری طاقت آتا نیام اٹ واقع ڈیہہ و 16ملین خلقت آتا است خواہی تا مظہر ئِ اودے گڑاس ہل و گڑاس تس نا اصول نا بنداو آ ایسر کننگ مفک و نہ ہی پاکستان دننگا پالیسی تا مخ تفی ئِ کیک۔ اوپارے کہ جنرل اسمبلی نا دیوان آن گڈ جہانی برادری نا خنک ملنگانو، بھارت بے پڑدہ مسنے داسا جہانی برادری کشمیر نا ویل انا ایسری کن تینا کڑد ئِ ضرور ادا کیک۔
