اسلام آباد۔ 16ستمبر (اے پی پی) پاکستان اٹی رہینگوک اوغان مہاجرآتا پدی ہِننگ نا عمل دُوارہ شروع مس، اسہ ہزار پنچ سد رجسٹرڈ مہاجر تینا وطن آ پدی سرمسنو، پدی ہنوک آ مہاجر آتے 400 ڈالر فی کس وخت اس کہ اقوام متحدہ نا ادارہ برائے خور مہاجر آتے اوغانستان اٹی مفت خور بشخ وپانٹ کننگ اٹی اختہ ئِ۔ یو این ایچ سی آر نا میڈیا ڈائریکٹر دونیا اسلم جمعہ آ ”اے پی پی“ تون ہیت وگپ کرسا پارے کہ بھلا عئید انا چھٹی تا وخت آ اوغان مہاجر آتا پدی ہِننگ نا عمل دفتر آتابند مننگ نا سوب عارضی وڑاٹ سلیسوسس ہرا تدوک آ دے عئید انا چھٹی تا ختم مننگ آن پد دُوارہ شروع مسنے۔ اوپارے کہ تدوک آ دے اسہ ہزار پنچ سد رجسٹرڈ مہاجر پشاور، اسلام آباد، پنجاب و کوئٹہ آن پدی اوغانستان آ رسینگانو۔ پدی ہنوک آ خاہوت آتے فی بندغ نا حساب آن یو این ایچ سی آر 400 ڈالر تننگ ئِ تانکہ او دُوارہ اوغانستان اٹی تینا زند ئِ تدیفنگ کیر۔ دونیا اسلم پارے کہ اوغان مہاجر آک ہراتم اوغانستان آ رسینگر ہ تو اوفتا کمک کن بین الاقوامی این جی اوز آک کاریم کیرہ، ہنداوڑ اقوام متحدہ نا جہانی ادارہ خور نا کنڈآن مفت خور تننگ انگ ئِ و مہاجر آتا چناتا تعلیم و تربیت نا بابت ہم کاریم کننگ انگ ئِ۔
